早幾個月前咪盛傳麥浚龍（Juno）會同環球轉合約形式嘅，但之後因為Juno同環球高層都牽涉入樂壇貪污案，所以件事就暫停咗，不過最近雙方又傾番，聽聞Juno已經同環球轉咗合約形式，由以前嘅唱片約變成𠵱家嘅發行約。
Juno嘅唱片製作𠵱家由佢同阿哥大寶組成嘅新公司負責，張碟做好之後，就交畀環球發行，情況同簽畀環球嘅陳松伶一樣。
環球𠵱家冇咗Juno，除咗即刻將余文樂解凍外，陳少寶重點名力捧十九歲嘅小師妹陳婉淇。陳少寶之前出盡力幫黃伊汶力挽狂瀾，黃伊汶轉咗形象亦有起色，呢次佢全力催谷陳婉淇，先安排佢同李克勤唱《合久必婚》合唱版，近日環球出英文碟《somewhereintime》亦搵咗佢拍廣告，之後宣傳重會陸續有嚟。
陳婉淇𠵱家錄緊新碟，趕喺十二月出街，希望爭奪年尾嘅女歌手新人獎，雖然唔知佢將來嘅成績點，但呢行就好現實，環球即使冇咗Juno，一樣可以捧番個擁有四十二吋長腿嘅小師妹接棒啫！
陳文媛（BoBo）噚日先後到山頂同旺角出席活動，BoBo噚日戴住嘅孖生嬰兒飾物成為話題，BoBo話：「條頸鏈係我喺日本買嘅，我都好有母性㗎，如果結婚一定會生仔做家庭主婦，最少生兩個啦。」
成龍日前去台灣宣傳新戲，電影公司招待佢入住總統套房。食嘢方面，成龍就好隨便，佢鍾意食嘅都係平嘢，好似牛肉麵、牛筋同水餃咁。成龍喺台灣食豆腐花時，嫌茶几同梳化距離太遠，寧願踎喺地下就咁食，食完重猛讚好好味㖭！
薛家燕（好姨）噚日喺奧海城出席「理遺教育週」活動，好姨話呢個活動係呼籲大家注意失禁問題，因為失禁唔只發生喺老人家或小朋友身上。好姨重自爆三十幾年前同沈殿霞（肥姐）拍戲時，因為忍尿太耐，當佢同肥姐喺戲入面打交時，搞到佢忍唔住屙咗出嚟。
郭富城幫香港旅遊協會拍嘅旅遊推廣劇《動感豪情》好快就喺內地同東南亞播映，為咗宣傳呢套劇，佢過幾日就會到各地做巡迴宣傳，城城話：「我八年冇拍過劇，十月喺台灣首播，所以我都好高興，因為我對台灣有份莫名其妙嘅感情。希望觀眾睇完套劇後，會有更多人嚟香港玩。」
