上個月（8月）香港有紀錄（汽車代理商）嘅房車銷量，總計有1,568部，較7月份再升多112部，當中日本車升幅較為明顯，數目多達978部，比7月多出298部新車，而韓國車亦較諸對上一個月多賣11部新車，總計有41部；惟連續兩個月錄得升幅嘅歐洲車卻見跌勢，8月總銷量僅549部，要較7月少賣197部咁多。其中，日本車仍以豐田及本田續領群雄，分佔榜內頭兩位，至於最突出莫過於凌志，響8月共售出104部車，要較7月多出61部車㗎！旗下不論LS430、ES300、RX300同GS300，銷量亦有明顯升幅呢！而本田仍以Jazz獨領風騷，8月共售出71部車，較7月多出17部，新款Accord銷量亦見平穩上升，共錄得39部嘅紀錄，要較7月同樣多出17部呢！再者，新近面世嘅三菱Grandis七人MPV，銷情亦見突出，8月共錄得51部嘅紀錄，較7月嘅9部初首業績，明顯見有用家追捧，反觀歐洲車只有平治跟寶馬保持到銷量咋！
