美股上周五「4重結算」，市況平靜，杜指、納指微跌，依然係大漲小回格局，對港股應有一定支持。富時環球指數更改成份組合，長實（001）、和黃（013）、中移動（941）同新地（016）比重下降，上周五因而被拋售，不過有關影響相信僅屬短暫，恒指如能守住20日線（10951）同上周低位10762，短期應有反彈，個別細價股更有可為。
第一電訊（8110）近期走勢出現突破，係一隻可食大茶飯的股份。
由年中開始，一電3次上衝30仙水平都無功而還，近日突破下降楔形阻力，且重上10日線及20日線之上，今次應可破位而上，初步目標係35仙。
睇長期走勢，由去年12月開始，一電成個大圓底，頂部就係在0.3元水平，今次若破頂，意義好大，顯示一個長期收集已完成，照度上去，中期上升目標係0.48元。去年3月中，一電股價曾高見1.14元，現價低出頗多。
一電係東南亞最大手機經銷商，無疑手機市場競爭激烈，盈利倒退，係股價低沉的主要原因，但一電係行內龍頭公司，除中國市場外，目前正大力拓展印度和大馬呢兩個市場，未來盈利不單止可重拾升軌，且可望出現高增長。
2002年底，全球流動電話用戶11億人，估計05年可上升至15億人。今年1月，亞太區用戶3.3億人，佔全球總數30%，其中中國用戶逾2.7億人，滲透率16%，低於平均水平，而印度用戶僅逾1000萬人，滲透率只得10%，未來發展空間極大。
由於手機不斷推出新款及改良增值服務，例如彩色顯示屏、具拍照及個人數碼助理等功能，刺激換機需求，一電有信心未來幾年的流動電話市場仍將高速成長。
一電去年營業額高逾60億元，獲利1.08億元，邊際利潤1.7%，屬於微中取利。現年度（03年12月年結）的上半年，營業額30.48億元，升2.4%，盈利1919萬元，跌79%，主要係涉及撥備及存貨減值，但睇過去3季，由虧蝕685萬元轉為有盈861萬元及1058萬元，其實正在好轉，估計今年盈利有7000萬元，明年更可重上1.3億元水平，每股盈利6.7仙，即使股價升上0.5元，預測PE仍只係7.4倍！
郭兆誠