飲食人誌：<br>毓民拖牛出擊決戰九龍城
<br>飲食人誌：
毓民拖牛出擊決戰九龍城
九龍城絕對係九龍區嘅搵食熱點，甚麼特色菜、甚麼名店，隨口都噏得出幾間，而且全部都晚晚爆滿排長龍。既然係飲食界嘅旺地，當然會不斷有新勢力冒起，今次介紹嘅新店就全部都有特色、有實力，足以抵擋一眾台柱食肆嘅圍攻。
記者：馬慶武、陳慧敏
攝影：陳盛臣、梁細權
公開兩公婆私房菜譜
毓民嘅牛肉麵店，餐牌上只有三款麵食加約十款小食，選擇唔多，「咁先更易控制及保持每款食物嘅質素；你去到茶餐廳，Menu上面有百幾款選擇，你咪食嚟食去都係最好味嗰幾款！」言下之意，毓民即係話全部菜式都咁好味啦？「係，全部都係我同太太嘅撚手家常菜，味味都係招牌菜。」就憑名嘴呢一句，已經係信心保證啦！
日賣數百碗
開舖數星期，晚晚門口都有人等位，牛肉麵日賣數百碗，毓民當然開心，不過開心並唔係因為賺到錢：「呢啲舖頭仔發唔到達嘅，賺得幾多錢吖？我寫幾篇稿都賺得多過呢度一個月啦！開舖係因為我不安於現狀，要自我增值，成功感比賺錢緊要！」說起開舖原因，毓民答得「寸」，但真誠。而見到客人食得開心，一樣令毓民感到滿足：「啲食物好食，客人自然食得開心。咁佢哋又鍾意見到我，同我傾吓偈影吓相又更開心，咁我見到啲客開心，我又開心。」提提各位毓民Fans，佢每日4、5點做節目之前都會嚟食嘢，呢段時間嚟食嘢隨時可以同佢傾幾句。
豬肝連$18
豬肝連係豬肝部份加埋旁邊嘅筋肉，肉質超爽口，黃太話夾幾條薑絲再蘸台灣醬油膏食就最滋味。
蒜香肉青$18
肉青爽口彈牙，不過最緊要係一碟蒜頭豉油汁，蒜香滿溢。
每枱一盅嘅秘製辣椒油，毓民極力推介：「食得辣嘅一定要試，堅㗎，真係堅㗎。」
「呢度嘅唔係台式牛肉麵，係我食過我太太煮嘅牛肉麵之後，改良而成嘅。」毓民更話開舖之前，請過好多朋友、同事嚟試味，足足試咗兩個星期先得出呢個「完美版」牛肉麵。
店內牆上掛滿漫畫家阿虫嘅作品，原來阿虫又係毓民嘅老友，而呢幅食牛肉麵嘅漫畫，更係阿虫為賀毓民新舖開業而畫嘅。
毓民私房牛肉麵
地址：九龍城福佬村道5-9號地下C舖
電話：27182889
營業時間：12:00nn-10:00pm
食客兩句
等毓民影合照
梁生：「牛肉麵湯底濃郁，麵又夠彈牙，幾好味呀。其實入嚟試都係因為毓民呢個生招牌夠吸引，我覺得佢講嘢幾啱聽㗎，佢等陣係咪會嚟？咁我等埋佢影張合照先走。」
住家Feel
梁太：「第一次嚟食，覺得牛肉麵的確係好好味，湯底濃淡適中，可能因為無落味精，所以好有住家Feel。」
泰國新派創意菜
愛食泰國菜嘅Jeffrey深深體會，要喺九龍城呢個泰國菜集中地生存，就一定要喺泰國菜中加入新元素。所以「籽苗葉」除咗擁有一間高級西餐廳嘅格局之外，亦自創出多款獨一無二嘅新菜式，誓要衝擊九龍城一眾泰菜老大哥。新張期9月內全店重有7折優惠，優惠期重有個多星期，快試！
Jeffrey話除咗新式泰國菜之外，都會供應傳統菜式。而開業數星期之後，發覺要喺九龍城經營泰國菜真係有一定難度，不過至今都有唔少「返頭客」，都算係有啲安慰。
南瓜炒雞$48
用日本南瓜加雞肉及雜菜煮成，日本南瓜肉質比泰國南瓜腍，更入味，而雞肉亦充滿南瓜香，味道互相配合。最後用原隻南瓜上碟，感覺更勁。
籽苗葉雞$80/半隻
先用泰國籽苗葉為調味，再以海南雞煮法製成，雞肉嫩滑帶淡淡獨特嘅籽苗葉香味，若嫌唔夠味記得蘸用辣椒、蒜頭、豆豉製成嘅特製醬汁試吓。
籽苗葉
地址：九龍城南角道16號
電話：27166233
營業時間：12:00nn-11:00pm
食客兩句
環境舒服
Karen：「覺得呢度啲菜式同一般傳統泰國菜有啲唔同，好有新鮮感。而且呢度燈光柔和裝修又靚，令人好舒服。」
菜式夠特別
Simon：「爆炸蝦好嘢吖，又香又辣又惹味，我次次嚟都食，而且重有好多菜式喺其他泰國菜館食唔到。」
打邊爐竟然唔燥
那邊廂有名嘴牛肉麵，這邊廂則有資深護士Angel駐場，一代名書法家梁繼光先生撐腰，封為「神湯」的蒙古肥羊火鍋。這家九龍城新貴，高倡火鍋潤肺養顏延年益壽，對高血壓、失眠、糖尿者更有醫療功效，跟一般火鍋「每食必燥」完全相反。
繼續做「羊肉煲護士」
當了十多年護士的Angel，因為工作關係，一直都好注意健康飲食，經常翻看藥膳書籍，自己研究，直至掌舵本地佛笑樓後，仍不離老本行，每次見到新客人，她和店員們總主動又耐心的為客人講解各種藥材和肉類的強身功效。講起身體狀況有好轉的客人，Angel就笑到見牙唔見眼。「之前有個患有腎虧阿伯，成日同朋友嚟。早幾日佢返來話我知，佢身體好咗好多。本來每晚5次夜尿，到而家得番1次。我聽到，心情就好似以前睇到病人日漸康復一樣咁高興。」
佛笑樓蒙古肥羊火鍋
地址：九龍城城南道48號
電話：27181081
營業時間：4:00pm-3:00am
九龍城愈夜愈旺，凌晨一點致電Angel，本年8月初才開張的小店仍是人聲頂沸，Angel忙得團團轉。
蒙古草原羔羊肉$38
肥羊來自蒙古不足180日大的小羊肉，這個時候的羊肉無論脂肪及膽固醇都較少，顏色紅豔，肉質嫩滑，還可以補血和明目呢。
特選梅花鹿肉$128
佛笑樓在蒙古大草原馴養的梅花鹿，豐富骨膠原比羊肉有過之而無不及，又是姐妹們美白潤膚的時候了！鹿肉只要燙個分來鐘就已經熟透，而且肉質鮮美，但煮夠半小時肉質會更軟滑，湯味也更濃。開鍋前，先放鹿肉吧！
招牌肥羊火鍋保健湯底
（特價$58；原價$98）
跟一般火鍋湯底完全相反，滋潤又不肥膩的保健湯底有巴瑤族野生白香菇粉、蛤蚧、天麻、冬虫夏草、桂圓等60多種藥材，每煲起碼要熬7-8小時，藥味香濃，入口清香；麻辣味頗激，正宗蒙古風味！
雪鷹美白蛋$68(6隻)
雪鷹蛋連殼都經秘製，煲到軟綿綿，通透靚樣已經虜獲人心。Angel說其營養價值比一般雞蛋高4倍外，重有美白功能，咁笋，真係貴啲都抵！
食客兩句
湯底鮮甜
Cammy：「我上星期嚟過一次，啲肉我就覺得OK，但就真係未飲過咁鮮甜嘅湯底，所以今次帶埋班朋友嚟試。」
羊肉唔羶
Stantly：「上次同女朋友食過，覺得啲羊肉一啲都唔羶，而且我最鍾意個麻辣湯底夠刺激！」
經濟版金不換
喺九龍城開咗9年幾嘅泰國菜館金不換，喺前排突然嚟個大變身，推出新菜式之餘，傳統菜式嘅價錢重比以前平咗一截。新裝修兼連老字號都放棄唔用，原來老闆Eddie就係為咗吸引一眾年輕食家，希望喺九龍城建立一間年輕兼抵食嘅金不換。
泰地道
地址：九龍城啟德道31-33號地下
電話：27181088
營業時間：11:30am-2:30pm；5:30pm-11:30pm
星期六、日及公眾假期：11:30am-11:30pm
新店新諗頭，每晚舖外都會有泰式雪條派畀等位嘅客人清涼下。唔知路過博懵攞番條食得唔得呢？
食客兩句
豬頸肉撈麵$40
豬頸肉蘸酸辣汁食相信好多人都試過，今次就用埋酸辣汁嚟撈泰國蛋麵，酸辣味極香濃，配埋炭燒豬頸肉，惹味程度爆燈。平日午市時間嚟食，$30更包一杯凍飲，更抵食。
金不換蝦士的春卷$35
齋睇個樣真係估唔到係咩，長條型嘅春卷上撒上黑芝麻，淨係個外觀都夠新鮮有型。餡料除用蝦膠外，重加入帶子肉及香料金不換，口味同樣嚟個大革新。
午市套餐抵食
陳生：「豬頸肉撈麵最正，香得嚟又唔太肥膩。我多數會午市嚟食，套餐$30連一杯飲品，夠晒抵食。」