根據過去幾年嘅經驗，如果一隻股票有參與賭博業務嘅消息出現，又或者獲賭王入股，通常都會大炒特炒。
近排漢基控股（412）獲賭王入股5%，兼夾公司講明會參與濠江賭業的衍生業務，但只見成交大，唔見股價升。
經紀陳話，查實隻股6月份已見異動，由0.10元附近起步，炒到上去最高0.32元後出現回吐，家陣在0.20元水平徘徊，上周五升3%，收0.205元。
至於點解公司講明有意在濠江大力發展後，股價仍然升唔上？原因同先前兩次集資活動有關。漢基首先喺6月，以每股0.10元配售最多7.1445億股，集資7140萬元，跟住喺8月中，發售一批金額最多7500萬元的三年期可換股票據，行使價每股0.20元。
雖然話第一次批股，有批貨落入賭王手上，但其他人亦有貨，而且唔係個個都諗住長揸，有人見高獲利好正常，況且隻股一直有班大戶坐住唔少貨，據聞佢哋亦趁好消息沽貨套現，漢基要重展升浪，相信仍要等多陣。
慕容小初