房屋及規劃地政局局長孫明揚最近頻惹官非，首先俾公屋居民告佢收多咗租金，跟住到班保護海港人士話佢唔尊重法庭判決，叫停所有填海工程。
睇嚟孫公係時候剃咗撇鬚，睇吓會唔會轉運嘞。
好彩孫公身經百戰，唔怕啲環保人士大聲。九七前，中方同新華社都大大聲鬧過，話港英撤出前想填晒個海港，整蠱香港，孫公跟過肥彭，睇嚟唔會咁失憶。今時唔同往日，阿董係都要填海，國家梗係逢董必支持。但係唔填灣仔至中環嘅交通問題點搞呢？如果你成日要出入中環，就知塞車之苦，所以有時令人懷緬五十年代葛量洪做港督時嘅宏偉海港，更緬懷沙士時期，交通暢通，連peakhour過隧道都唔使排隊嘅日子。
不過孫公承認，香港人始終好相處，早前佢去街市，啲賣魚嘅小販話，佢都係公屋居民，佢覺得租金並唔貴，孫公話多啲落區解釋聽意見係值得啲，重同八方話「公道自在人心」，政府最後會贏。
傳真︰2623-9278
電郵︰