屯門區特別多有房出租嘅個案，一般全包月租都要兩千蚊，但早前有單成交竟然唔使千三蚊。
祥益地產講，屯門雅都花園隔籬嘅康麗花園，一座低層E單位，面積六百二十九方呎，三房設計，最近有一個房以全包月租一千二百五十蚊租出。佢解釋話可能因為地點唔同，所以租值低啲。原來個單位另一間房，之前都係以呢個價錢租咗。
咁區內最平嘅房租幾錢呢？聽講一千蚊就有交易，但係面積就細啲，祥益話租值低成咁，都好難再跌嘞。經濟唔好，低收入市民愈嚟愈多，對於單身漢嚟講，個房淨係用嚟瞓覺，可能平租重緊要過房間嘅大細。
另外，最近呢兩個禮拜，屯門區嘅整體租務成交，月租最平都要兩千五百蚊，睇嚟房間嘅成交個案少咗好多。蘭西心諗，唔知係咪同近嚟警訊報道，有賊人借睇樓行劫案件有關呢？
內地十．一黃金周就快到，為迎接大批自由行客來港，政府正全力處理旅客住宿問題。
酒店同賓館業主已各出奇謀吸客，明愛屬下嘅旺角明愛賓館，同油麻地明愛白英奇賓館，推出租房優惠，租住三晚或以上，送港島半日遊，包括去灣仔金紫荊廣場、太平山頂、香港仔同淺水灣等景點，價值二百二十蚊。上述提到嘅，幾乎係內地客必到景點。另外重加送早餐，實行以價廉取勝，同酒店搶客。
十‧一國慶臨近，本港商場都大搞活動迎接商機。新地嘅旺角新世紀廣場，今個禮拜六開始，展開一連串「大隻佬」活動。消費滿二百蚊（單一發票計），就可以去「大隻佬」劉德華國慶紅人館，同電影「大隻佬」主角劉德華嘅十米高立體人像模型影番張相留念。
假如有兩張即日嘅發票，夾埋係三百蚊，就可以參加抽獎，獎品有「大隻佬」戲票、手提電話同購物禮券等。若果兩張即日發票金額有四百蚊，就有機會換到「大隻佬」劉德華即用即棄相機一部，重附有二十四張菲林。
搞咁多噱頭，可見商場雖旺番，但大業主仍未敢鬆懈。
曝光率唔多兼緋聞絕少嘅前港姐原子鏸，唔知係咪最近連拍幾部戲，又做某纖體公司代言人，荷包膨脹，心思思想買樓。佢噚日就靜雞雞去睇鴨脷洲深灣軒示範單位，蘭西埋去傾咗兩句，佢話未住過港島區，所以想試吓。
原子鏸話覺得個盤有海景，都幾正，而且𠵱家樓市都OK，自己亦有信心。佢話如果買嘅話，會同媽咪鄭佩佩一齊住，媽咪財政上重會支持佢，但就完全冇提到男友鄧健泓會唔會支持佢噃。不過鄭佩佩就未睇過個盤，唔知睇完示範單位，知道售價後，會唔會即刻扑鎚呢？
呢排住宅交投雖然轉活，但銀主盤就冇因此減少，相反重多咗㖭。聽中原測量師行董事總經理黎堅輝講，𠵱家約莫有四千七百一十一個銀主盤，多咗些少，當中住宅佔三千五百幾個；售價喺二百萬以下嘅比例最多。睇番資料，6月嘅銀主盤係四千六百宗。
黎堅輝講，銀主盤嘅成交都多咗，不過，由於銀行一向冇咁貼市，所以叫價暫時都未見調升，遲啲就唔敢包嘞。
蘭西
電郵地址：
