貨櫃車司機鄭家豪，上月才與妻子及兩名女兒慶祝四十九歲生辰，未料事隔短短日子，一家人已陰陽相隔。有「好男人」之稱的鄭家豪，本月初在運送皮革時，被塌下來的貨物活活壓死，遺屬傷心之餘，亦為往後的生活憂心不已，蘋果日報慈善基金即時撥款助度難關。
慘劇發生後，遺孀鄭太和長女阿儀連日來四出奔走，希望找出意外的真相，可惜至今還是毫無頭緒。「件事係點發生，我老公點解會無端端走去搞啲貨，到𠵱家都冇人可以話到畀我知，到目前為止，我老公都係死得不明不白。」鄭太一臉哀傷地說。
事發於本月八日下午，鄭家豪駕駛着滿載皮革的貨櫃車前往屯門內河碼頭，準備接載第二批貨物時，當他打開貨櫃門之際，疑因貨物擺放不穩，多卷共重約半噸的皮革突然滾出車外，鄭家豪懷疑閃避不及被壓個正着，當場重傷昏迷，及後才被其他工友發現，惜他送院後證實不治。
四十五歲的鄭太哭訴：「我老公當日下午一點幾先打過電話畀我，話嗰日加咗幾張單，好多嘢做，要夜少少先番屋企，真係諗唔到佢會唔返嚟。」
鄭家豪與妻子結婚二十五載，夫婦育有兩名女兒，長女二十四歲，任職船務文員，幼女十七歲，為預科學生，一家四口生活融洽。鄭太說：「我老公真係絕頂好男人，唔煙唔酒，平日最大嗜好就係返屋企陪我同兩個女食飯。」長女阿儀亦說：「我爸爸真係好錫我哋，佢好慳，衫褲鞋襪着到霉霉爛爛，補完又補都唔捨得丟，不過就成日吩咐我返工要着得光鮮啲，又不時問我夠唔夠錢買衫，佢真係一個好好嘅爸爸。」說到此際，阿儀亦不禁哽咽起來。
對於鄭家豪猝然離世，除了叫妻女嚎啕大哭外，經濟上亦頓失依靠。任職運輸業十多年的鄭家豪，受近年本港經濟不景氣影響，經常開工不足，收入大幅減少，每月平均收入只有八、九千元，長女阿儀的工資更加微薄，自顧不暇，孤寡彷徨不已。
「𠵱家個心好亂，好擔心以後嘅生活唔知點算，就算我出番嚟做嘢，𠵱家咁嘅市道，都未必可以即時搵到份工，一頭家咁多開支，真係搞唔掂。」鄭太輕聲歎道。
蘋果日報慈善基金了解過鄭家的困境後，即時撥款二萬元，暫紓經濟壓力。 捐款編號：C1119
暖流熱線
電話:29908688
傳真:23702192
電郵:
網址：
