暫時最巴閉嘅大藍籌係滙豐（005），上周收103.50元，創01年3月以來最高。中銀（2388）先一排亦都好勁，但上周只升得10仙，跑輸畀滙豐，滙豐上周升3元。
有咁嘅可能，滙豐喺歐美銀行股帶動下，破新高後再升多幾蚊，而滙豐升，則又再帶動中銀。中銀Call輪，不妨搵一兩隻炒吓。
中銀Call輪幾乎有滙豐Call輪咁多，輪多眼亂。唔計另類Call輪，成交最多嘅係9059，明年3月到期，輪價88仙，溢價4.5%，槓桿率11.8倍，唔錯；其次9073，明年5月夠鐘，輪價91仙，溢價3.8%，槓桿率11.4倍，數據亦唔錯，其實靚過9059少少；9031交投少過前面兩件，但輪價1.50元，有負溢價0.2%，而槓桿率6.9倍唔算細，明年5月到期又唔輸蝕，呢件嘅數據，可以話正到痹，揸9031唔使蝕溢價。
上周五電訊股中，最出色嘅聯通（762），收6.15元，升3.4%。中移動（941）跌2.1％，收20.55元，中移動有機會追上去。上周五晚倫敦港股反彈78點，係反映港市大摩指數降低藍籌比重嘅謠傳獲得「平反」，重磅藍籌股上周五跌得失魂嘅，今日有機會彈得似樣。博中移動Call輪跟正股上番去，可短炒9861，隻輪上周五收32仙，散9%，12月到期，溢價3.2%，槓桿率6.4倍，數據靚。
章 盛