自由行，自由踎，精采絕倫。多得自由行，我們才得以大飽眼福，有機會看到大陸同胞的自由踎有幾高招。大庭廣眾，話踎就踎，數踎得如此順其自然、悠然自得，真的只有同胞們做得到。就看看他們演繹這份隨處踎的「藝術」吧。
記者：陳漢榮
攝影：伍慶泉、陳漢榮、朱崇德
模特兒：Cinmi、Uranus、Corlis、琛仔（RichStrategy）
踎，這個易做的動作，無可否認同胞們發揮得比我們好，男的女的老的嫩的，手拖一袋二袋，雙腿一屈，何時何地也可以一踎，不怕累也不怕跌。咁講，雖然普羅市民都在踎功上不敵大陸同胞，不過論到踎得刁鑽踎得型，都係我哋贏！
踎，也可以很美，有請瑜伽高手黃佩霞示範。「呢個姿勢叫ToeStand，難度高，先選擇重心腳，例如左腳腳尖撐地，右腳就要屈起放喺左腳大髀，慢慢踎低，之後雙手合十，保持平衡。」
走過街頭巷尾，發覺土產踎街奇招層出不窮，高招程度分分鐘撼贏大陸同胞，好似砵蘭街Dick仔，踎上欄杆倚着身旁的馬檻燈箱，刨馬經刨得津津有味：「無碇坐咪踎囉，邊度都踎得㗎，我踎得高難度啲啫。」
香港最多人踎的地方，當然是投注站門口，今日就看到這賭徒甲，踎街狂抽煙刨馬經，一踎2小時，姿勢未換過。問賭徒甲為何愛踎，他答：「走走走，訪乜嘢問，咪阻住晒。」
究竟踎街這門功夫，難度有幾高？不妨聽聽專家解構。家庭醫生關嘉美的專業意見：「踎，難度可以分三級，兩隻腳板完全掂地最易，淨係用腳尖掂地難啲，最難梗係半踎半坐嘅無形櫈喇。」
再請Uranus、Corlis與琛仔測試，發覺持久性果然隨難度遞減，失平衡的一刻，三人跌的方向也不同，而且認真失威，三個接受測試的港人，最勁都踎唔過兩分鐘！
如此踎法，辛苦多過休息，難怪曾幾何時，成為老師懲罰學生的辣招！
用呢招嘅人唔少，不過不易平衡，隨時搞到抽筋！
大陸同胞最多人用呢招，身體緊縮，行得耐當休息又似乎可減輕腳部疲累。
認真點，關嘉美醫生重有嘢講：「理論上，人唔應該長期踎，因為踎係一個違反自然嘅肢體動作。長期踎，盆骨、足踝、膝頭、腳趾等關節會慢慢變形，關節之間的軟骨組織會因長期受力磨損而移位。血壓高或低嘅人忌踎，如果發覺企起身見暈，就千祈唔好踎；肥人平衡力差，更加唔好踎，一仆，好易骨折，唔講得笑。」
一般市民對大陸同胞周街踎的舉動都不太接受，不過凡事有例外，只要踎得夠搶夠性格，唔拘！睇睇街坊推介的搶鏡踎法，大陸同胞不妨效法！
效果：全街矚目
