八方噚日提到曾慶紅副主席喺廣東點樣擺平各路諸侯嘅利益，要以大局為重救香港，講完一番用心良苦嘅說話之後，曾副主席特別指示：八月喺香港舉行嘅第六次粵港合作聯席會議，開得好好，打下良好合作基礎咁話。
榮獲領導讚賞，八方第一時間打電話去恭喜煲呔愛將蔡潔如Kitty，皆因佢係粵港合作統籌小組嘅組長。點知蔡小姐唔喺香港，去咗北京國家行政學院受訓兩周，粵港合作唔易搞，蔡小姐總算喺天時地利下捱到啲成績出嚟，將來肯定升官有望。
以前八方只聽過啲高官去清華學普通話同埋何謂中國嘅紅頭文件；或者去哈佛進修公共行政，好少聽有人去大陸上幹部課程，但係公務員事務局就話八方少見多怪，已經去咗唔少人。點都好，Kitty今日學成歸來，參加過共幹學習班，感覺上肯定賓至如歸過以前AO去牛津，做中國人嘅光榮發自心底。
（圖）煲呔愛將蔡潔如（右）去咗北京國家行政學院受訓兩周。
傳真︰2623-9278
電郵︰