新車速報：<br>豐田EstimaS.W.A.T.特別版內外俱正

新車速報：
豐田EstimaS.W.A.T.特別版內外俱正

近排一套《S.W.A.T.》（特警雄風）電影，唔止給影迷有官能刺激，而且重觸動到汽車商嘅靈感，炮製出呢部豐田Estima3.0特別版；新車唔止賣相突出見動感，新加入承托力十足嘅全新雙色皮椅，就算要作長途行車，都唔易感到疲倦㗎！
記者、攝影：陳偉林

■只要略加包裝配搭，斯文嘅MPV亦可變成S.W.A.T.行動時嘅運輸工具。

S.W.A.T.特別版有型吸引
呢部全新豐田Estima3.0S.W.A.T.特別版，至為令人覺其突出吸引嘅地方，莫過於全車裝有動感包圍之餘，前後四輪重換裝上原廠Low低嘅Racing化避震，有助行車穩定外，同時亦令呢部豐田Estima新車，看來更靠貼路面，好有一份房跑車嘅風姿㗎！

■三幅式真皮跑車軚環，重備有半自動波選擇鍵，倍添一份駕駛樂趣。

座艙講究見實用
除賣相有瞄頭之餘，新車座艙三排七座位設計，重用上最新剪裁，除提供十足嘅承托性外，雙色真皮包裝亦見講究吸引，當然少不了重有雙電趟門鋪排、至新大面板音響同前後獨立恒溫冷氣組合㗎！加埋三排座椅相互配搭，既可以騰出闊大嘅載物空間，兼且重係郊遊玩樂嘅理想卧鋪㖭！

■整個座艙烘托得活力無限，一份誘人魅力油然而生。

■中排一雙獨立座椅，兩旁重附有最新雙電趟門組合，上落車更感輕鬆。

■前後三排高級皮座，用上雙色配襯及重新剪裁，有更出眾承托力。

■鑲以黑桃木嘅中控台，有至新大面板音響連恒溫冷氣，以及杯座同雜物匣組合。

■中排之間備有活動桌几跟杯座，好用又方便。

■雙天窗加埋前後獨立照明，以及送風裝置，車廂倍感講究得多。

半自動波更富好玩一面
新車沿用一台3.0公升V6偈，匹配上4前速+/-半自動波連軚盤按鍵，既可以作全自動操作，又可以當手波車轉檔使用，盡將呢部外裝跑格、內裏講究氣派嘅七人MPV發揮至極，加上穩紮底盤結構，可謂相得益彰。

■新款悅目嘅表板鋪排，既易看又見魅力。

High-tech外形見辣味

■一體式泵把連大型氣霸，予人看來倍見活力感；而一對頗有神氣嘅Xenon頭燈組合，重有高聚焦霧燈作配搭，份外吸引又奪目。

■車頭擋風玻璃亦備有擾流器，既時尚又富保護性。

■兩旁門邊電鏡加有方向燈號，除奪目之餘又有型。

■雙叠式尾定翼配搭，重有見安全性嘅High-mount煞車燈組合。

■尾泵把附整流設計外，重有標準泊車感應裝備。

■多盞式高聚焦尾燈，重附有整流配件，有型又突出。

豐田Estima3.0S.W.A.T.特別版小檔案
引擎：2994ccV6DOHC
馬力：220ps/5800rpm
扭力：31.0kgm/4400rpm
尺碼：4750×1790×1770mm
軸距：2900mm；車重：1720kg
新車售價：$339,000（標準版）
車輛提供：富利堡汽車（23330747）

記者話：樣靚坐得舒適
呢部裝有全車配件嘅豐田Estima3.0S.W.A.T.特別版，望落好有跑車Feel之餘，就連車內全新雙色真皮座椅，乘坐亦見貼服舒適，而一台3.0公升V6偈，又見有慳油好力嘅表現呢！

■新車沿用一台可靠耐用嘅3.0公升V6偈，輸出強勁又慳油。