比提小姐奉調至倫敦做工，不經不覺已有兩年，最近佢嘅校友去倫敦旅遊，順便探訪比提，問比提生活如何？比提話：「做得好興奮，主要係公餘時間可以到各地遊覽，譬如周末去巴黎、布魯塞爾、阿姆斯特丹，放長啲假就去瑞士、德國，甚至西班牙，領略咗好多文化知識。留喺倫敦，淨係去大英博物館、皇家藝術館、大英圖書館，都可行到腳軟啦。」如此說來，比提咪快活過神仙？
比提話：「咁又未必，古語話『長安不易居』，我就話倫敦生活難，呢度啲生活費好貴，租金高，飲食費用唔平，的士費一程周時要十鎊八鎊（咪錶落旗費就已經兩鎊四），坐巴士一程要一鎊，搭地鐵要一鎊六，食一餐飯，一個人隨時要十零二十鎊，你計吓一日三餐要幾多錢？我支港幣人工，英鎊猛咁升嘅話，我就要慳啲使。」一鎊大約等於港紙十二個半，二十鎊等於二百五十元，一日三餐又真係幾貴噃，交通費更加高。校友見完比提，去到唐人街搵陶傑筆下嘅「旺記茶餐廳」，但竟然搵唔到。經過一間書報社，入內買報紙，《蘋果日報》賣三鎊半，《信紙》兩鎊半，《明報》好似係三鎊，買咗三份隔夜香港報紙就用咗九鎊（一百一十二元五角），校友肉都赤埋，不過人在外邊，心懸香港，唯有忍痛，真正領略到比提所講嘅「倫敦生活難」。倫敦咁貴，但係遊客從四方八面而至，入夜後唐人街附近地區簡直人山人海，但好少聽到英文喎！校友話：「希望香港咁興旺咁國際化就好咯！」