今年Casio出嘅Z3同S3可謂威到盡，唔單止出街後幾個月頻頻斷貨，而且重攞埋EISA本年度小型機大獎，絕對叫好兼叫座。Casio乘勝追擊，保留輕巧體積優點，以提升解像度為主嘅新機Z4啱啱有行貨派街，400萬像素CCD再加三倍光學變焦，務求推高入門市場嘅標準。
記者、攝影：徐影龍
ImageGirl：Carman（P8）
剛剛推出CasioEXILIM系列新機Z4，外形跟舊款可謂九成相似，仍以纖薄輕巧及光學變焦為賣點。之前曾多次訪問過唔同嘅DC舖頭，店主不約而同都話EXILIM系列長賣長有，幾個月嚟打低唔少新機嘅銷量。大紅原因，首要因素肯定係外形設計，雖然銀色四方機身唔算太突出，不過全金屬外殼反而畀到人一種穩陣嘅感覺，尤其係極為纖薄嘅設計，拎出街用相當之方便，不論放喺牛仔褲袋或女士手袋都唔阻地方，興致一到大可肆意滿足SnapShot癮，隨拍王可謂當之無愧。
雖然講薄唔及同系列嘅S3，不過配搭三倍光學變焦鏡，厚度微增已經畀到人驚喜，喜愛SnapShot人士有更大嘅拍攝靈活度。
外形跟舊款相差不大，不過CCD就由300萬提高至400萬像素，就算大至A4Size嘅相都嘅表現都好細緻，對要求日高嘅用家實在吸引。感光元件跟Z3一樣採用1/2.5"CCD，面積一樣不過解像度提升，故此Casio特意改良其NoiseReduction技術（抑噪），令到暗位表現免致出現「一笪笪」嘅情況。值得一讚係其2"大芒，睇相同攞構圖都舒服得多。
大白天下影相，可憑住ISO50而令相片細緻度提升，而自動模式下，曝光及人物膚色相當理想，唔似某啲牌子DC咁過份偏紅或偏黃，整體表現不俗。
驟眼睇Z4比Z3只提升100萬像素，其實唔少功能都有細微調整，以及加入獨有功能。除CasioDC例牌必有嘅快速開機、短時滯、相片日曆等功能外，Z4重加入齋錄音功能，當正數碼錄音機用都得，而且透過新加嘅小喇叭，所有相片Memo、錄音都可即時聽番。動畫方面由30秒增長至60秒，算係小小嘅突破。較失望係仍舊採用鋰電池，補充上稍為不便，幸好新機已改良耗電量，比舊機約莫慳10%。
抵讚：機身體積不變，質素及功能有所提升，見證科技不斷進步。
要彈：欠缺進階功能可以理解，但點解連最基本嘅AVOut都冇？
變焦：3×光學
屏幕：2"TFT
快門：4至1/2,000秒
體積：87×57×23.1mm
重量：129g
捷成洋成 查詢電話：29262320