國家解放思想，海南島三亞舉辦中國小姐選舉，準備十一月參加同樣喺三亞舉行嘅世界小姐比賽。
呢次三亞嘅國際小組，依八方睇，有兩大歷史意義：第一就係國家正式同選美平反。國家一向將選美列為西方資本主義侮辱婦女嘅腐朽行動，雖然國家自己好多地方都有選美，不過老一輩革命家如鄧小平、陳雲、彭真等人重未死清光嗰陣，為咗避免老革命家激到心臟病發，通常都改個名，叫做選羊城最佳模特兒之類，男女一齊選，以示平等。
今次唔使嘞。胡溫當政，以民為本。選美最講究三圍數字，三十六、二十三、三十五，就係美貌與智慧並重，可以搵到大老細包起照顧嘅三個代表，又可以促進廣告收益、消費狂熱，咁嘅先進文化，唔嗱嗱聲引進，又點對得住先烈呢？
另一個意義，即是可以透過選美，進一步孤立台灣。世界上只有一個中國，海南島一舉辦中國小姐，已經不存在嘅前中華民國前總統連戰夫人、title同樣係中國小姐嘅連方瑀，當堂就變咗好似先幾日話行將拍賣嘅圓明園狗頭國寶咁，自動宣布原來係假貨嘞。
海南島舉辦世姐，台灣又冇得派女參加喎。叫做台灣小姐？即是搞台獨，喺後台化妝嗰陣，喺各國佳麗面前，台灣小姐話唔定會俾中國小姐摑兩巴掌，用高踭鞋踢兩腳，再罰佢揸住支國旗，跪地向各國佳麗大聲高呼台灣係中國不可分割嘅領土。搞到台灣小姐個身瘀到一笪笪，點樣喊住出台行catwalk呢？
以中華台北小姐身份參加又唔通，會引起台南高雄嘅閩南婦女抗議，話個女仔好似淨係代表台北嘅靚女咁大把，加深省籍矛盾，明年總統選舉，又係益咗阿扁。
選美地點揀海南三亞，就有少少爭議嘞，海南島出名係繁榮娼盛，連內地啲幹部都有順口溜：「不去海南不知自己身體不好」，大江南<