「老馬季初當旺」呢句話真係無花假，好似今季英超就有個舒寧咸，德甲有個麥斯。今季加盟錫耶納嘅基艾沙前日對安玻里連中三元，威到盡，數意甲開季出閘彈出嘅老馬非佢莫屬。今季睇意大利波，要多啲留意呢位前意大利國腳嘞。
呢位三十二歲前鋒話老唔算好老，但閱歷就認真多。佢踢過好多球隊、拍過好幾個世界級前鋒，而佢兩年前事業最高峯嘅時候不幸斷腳，搞到舊年嘅世界盃都冇份踢。我求大俠有睇佢上場對國米嘅表現，係就係未回復最佳水準，但功架十足、入楔時間準，爭取到唔少射門。至於前日佢唔單止入三球，據報另外重有球波入咗被誤判詐胡，否則已經「大四喜」。之前有輿論話基艾沙轉投升班馬擺明養老，基艾沙前晚可以話用行動作出大反擊。
足球搞事係意大利足球一大毒瘤。前日意乙艾維連奴對拿玻里場波，就因為發生過百名拿玻里球迷賽前衝入球場，搞到場波要擇日重賽。
唔止咁，賽前重有個球迷響推撞中由看台大概十米高跌落地，情況危殆。睇波啫，搞到連命都冇，真係搵鬼睇囉。
呢排英超聯邊個領隊首先被炒成為熱門話題，季前曾成首位被炒領隊大熱嘅車路士雲尼亞里，雖然目前帶住班波打得唔錯，但就算佢真係被炒都唔使憂，因為佢同球會嘅合約，如果被炒嘅話將可獲賠償七百萬鎊（約九千萬港元）！咁嘅風流工，真係恨死好多人！
下個月英格蘭對土耳其嘅歐洲國家盃外圍賽出線大戰，已經落實由丹麥球證尼路臣執法。呢個咪係九八世界盃用紅牌趕咗碧咸出場嗰個高佬球證囉！雖然尼路臣之後都執法過曼聯有碧咸在陣嘅歐洲賽事，不過再遇上身穿國家隊球衣比賽嘅碧咸都係第一次，會唔會又有「傑作」呢？
英格蘭領隊艾歷臣經常係直播賽事座上客，當然佢有責任睇多啲球員嘅表現。不過前晚直播波熱刺對修咸頓又見佢出現。呢場波應該只有比亞堤值得睇吓，點解佢唔去睇吓有土耳其佬艾比耶及另一國腳華素爾在陣嘅維拉對查爾頓呢？唔通真係博上鏡？