人哋話一年容易又中秋，計我羅拉話一年容易又到女星出月曆嘅日子就真，每年九月我都會大破慳囊，搜括大小女星嘅新年月曆，為大家逐一介紹。不過目前手頭上嘅優香、木村佳乃同尹孫河嘅二○○四年作品，都令我好失望，因為佢哋個個sell自然，同平時影嘅靚相冇乜分別，兼且唔多性感，優香個Look好似重娘過佢初出道嗰陣。
優香嘅月曆每年都係最受注目嘅一個，畢竟佢曾經係廣大男fans心目中嘅性感女神，上年佢一輯背心小天使，令唔少人對佢今年作品都有期望，點知優香今次淡掃蛾眉，衣着求其，我勸各位都係等佢今個星期五出嘅新寫真集好過。
而年年月曆都好博吓嘅木村佳乃，可能見上年大露背都唔能夠令佢逃離月曆倉底貨之列，今年改變策略，寫真以簡單為主。反觀今年第一次加入月曆戰團嘅韓女尹孫河就較捨得揼本，形象多變，亦有性感shot，可以殺出重圍都唔定。