【本報訊】屯門發生滅門倫常慘劇，令人震驚，心理學家指因經濟問題而出現尋死念頭者，往往在事發前有迹可尋，若親友能注意加以協助，便可能避免悲劇發生，社會福利署臨床心理學家袁志成呼籲陷入經濟困境者三思，「冇一個問題係解決唔到，只要冷靜諗一諗，可能唔係個好大嘅問題。」
臨床心理學學家梁若芊表示，一個人面對經濟問題，最初會表現得憂慮及不安，若財困持續，情緒便會因想不到解決方法而顯得暴躁，開始與家人爭執，「如果發現親友或鄰居有呢啲唔尋常表現，關心問候一句，可能幫到佢哋。」她說若經濟長期有問題，當事人可能會出現嚴重情緒抑鬱，「呢個階段最危險，因為一時衝動失去理智就會想到自殺。」
明愛向晴軒督導主任郭志英指出，一個人山窮水盡的時候，會覺得自己已沒有能力解決問題，慢慢鑽牛角尖而想到走上絕路，「變得唔想見人，避開所有親戚朋友，極端者可能會因歸咎屋企人而同歸於盡，另一情況係擔心心愛嘅家人冇人照顧而想攬住一齊死，其實兩個都係極愚蠢嘅諗法。」郭志英續稱，親友要提供幫助，切記不要責怪或刺激當事人，「錢點都要還，與其鬧佢，不如幫佢諗辦法度過難關重實際。」