牛一收成龍DV：龍嫂，生日快樂！
Yumiko：我唔會以身相許

鄭希怡（Yumiko）與成龍傳緋聞多時，成龍真的對她照顧有加，當年成龍的一通電話，令欲踏入華星之門的Yumiko轉軚加入英皇，現在成龍更毫不避嫌直呼她做「龍嫂」，雖然成龍對她有知遇之恩，但Yumiko卻揚言絕不以身相許，因為她不能接受跟人分享愛情。

緋聞篇
與成龍阿嬌三人行
鄭希怡與成龍的緋聞傳了將近一年，成龍對Yumiko愛錫有加，勸她加盟英皇，還送她名表。至本月六日Yumiko牛一時，他在DV中錄音，祝她生日快樂，種種事例都可看出成龍很疼她。

成龍勸簽英皇
緋聞雖然傳出多時，但Yumiko說她對成龍從來沒有愛情的感覺，日前她在中環接受本報訪問時，便大談這位緋聞情人，她說：「我梗係唔會鍾意佢（成龍）啦，但佢係有幫我，我十七歲時參加華星舉辦嘅「新秀歌唱比賽」。不過，之前我有見過楊生（楊受成），到入準決賽嘅時候，楊生打畀我，佢同我講如果我入到決賽嘅話，要同華星簽經理人約，佢叫我考慮吓退出，跟住佢話等陣，畀個人同我講，接電話嗰個人話：『我係成龍，我覺得你退出好啲喎，楊生好有誠意，你自己揀啦。』後來我就同TVB同埋華星嘅人講退出，如果嗰時唔係成龍嗰個電話，我諗我簽咗華星啦。」

「佢要得我一個」
本月六日是Yumiko二十二歲生日，她的fans很有辦法，請來劉德華及成龍等拍了一條祝她生日快樂的DV短片，Yumiko重複成龍在短片中的說話，成龍是這樣說的：「龍嫂，生日快樂喎，希望唔好有咁多緋聞，你要努力做嘢呀，算啦，啲嘢由得人哋講囉。」
成龍公開稱呼Yumiko做龍嫂，Yumiko揚言不會介意，她笑說：「應該搵次大家拖住手，佢一手拖住阿嬌（成龍另一緋聞女友鍾欣桐），一手拖住我，冇嘢就唔會驚，人哋有個老婆有個仔㗎，但我對愛情會幾霸道，我同男仔拍拖，佢要得我一個，我接受唔到同人share（分享）。」
問Yumiko成龍有否追求她？她馬上說：「冇。」成龍有沒有單獨約會她？她說：「都冇！」那電話聯絡呢？Yumiko說：「發誓乜都冇，我冇佢電話，佢都冇我電話。佢有我電話嘅話，我發誓自己隻新碟賣得一張，就係得我自己買。」

「唔稀罕買名牌」
但Yumiko感到成龍對她有知遇之恩，她不禁笑說：「不過我唔會以身相許㗎，在心中啦，我飲水思源，會記得嘅。」
成龍曾表示有很多女星主動找他，為的是希望爭取拍片機會，獲成龍青睞的Yumiko其實也可因利乘便，但她說：「唔需要，做人都係腳踏實地好，行捷徑唔係好事，用自己實力同勞力得番嚟嘅嘢，會更加珍惜，用某種手法得到都冇滿足感啦。有好多女仔好虛榮，賺錢買名牌，我真係唔稀罕，日日周身名牌，過闊太嘅生活，我唔覺得開心。我自己賺錢，買嘢唔使太貴，去做一啲嘢而得到物質，自己都睇唔起自己啦，你喺人哋面前幾風光，返到屋企自己都唔鍾意自己，冇意思啦。」
至於另一與她傳緋聞的美容院太子爺兼吳浩康表哥阿Ben，Yumiko重申二人只屬朋友關係，但她為怕遭人利用宣傳美容院，故亦不想多提。
撰文：朱倬誼
攝影：陳慧安
服裝：SistyrMoon
髮型：Mike&Marco（Chin.G）
場地：Chin.G