個個女仔梗會恨着一次婚紗，唔理你係傳統派清純玉女，定係胸前偉大嘅水着女星，最近有本雜誌《Frau》就搵咗觀月亞里沙、佐藤江梨子、佐藤康惠、同須藤理彩等女星，做咗個佢哋最夢寐以求嘅白色婚紗特輯，當中有人鍾意傳統又有人試玩新嘢，江梨子重話諗住着嚟宣布自己閃電結婚！
啱啱出咗本散文集《肝心喝茶》大晒文采嘅佐藤江梨子，性感野性嘅形象一向深入民心，所以今次佢都揀咗條反傳統大露腿開衩裙。佢好滿意咁話：「就係因為對腳暴露太多，胸前保守番少少取個平衡！如果着住呢件衫出席電影首映，呃大家話我結咗婚就最正！」江梨子小姐，作新聞唔啱㗎喎！
做十幾年藝人就做足十幾年模特兒嘅觀月亞里沙，着婚紗都唔知第幾次，但原來身材高䠷嘅佢，反而鍾意啲啱日本女性身段嘅可愛短小型婚紗裙。觀月憧憬做童話主角，但好似今次咁樣，設計師都係安排佢着騷身材嘅宮廷裝禮服。
佐藤康惠呢件有暴發戶feel嘅婚紗我羅拉真係唔敢恭維，佢身為模特兒着成咁真係有啲失禮，但佢始終好專業咁話個配搭好新鮮，令佢想跳舞喎！
須藤理彩呢件上身同下身夾埋有兩個心形嘅婚紗，我羅拉個人認為好似個花樽，但佢話反而令冇諗過着婚紗結婚嘅佢有咁嘅衝動。