又到一年一度嘅街機展（AMSHOW），估唔到今年啲廠咁慳皮，勁Game唔算太多，數得出嘅有《OUTRUN2》、《GUILTYGEAR：ISUKA》同埋《待魂：零》咁上下，而最搶眼就梗係《ZGundam》啦！今次唔單止保留上集嘅爽快感同操作親切兩個優點，重新加變形同合作GAUGE之類嘅新系統，令到戰術變得更加多元化，最緊要係好似上集咁一路玩一路有《ZGundam》主題曲同配樂聽，所有㗎仔試過都讚投入感比上集有過之而無不及。《GG：ISUKA》方面，今集最大特色當然係四人對戰，除咗互毆外重可以玩隊制，更可以玩埋一揪二，認真有挑戰性。另外相隔十七年先至真係出續集嘅賽車名作《OUTRUN2》，用上世嘉新機板「千尋」開發，出嚟嘅畫面質素高超晒班，最值得讚係背景仔細得嚟又充滿速度感，不過因為佢擺得幾部機，所以平均都要等一個鐘先可以玩到一鋪。
作者介紹：曾任職香港遊戲雜誌編輯，現於日本讀書及工作。