自從祖國簽咗世貿協議後，好多老外對於祖國嘅保險業表示興趣，幾年前小小超入主盈科保險（065），諗住借隻盈保打入內地保險市場，不過由於內地對外資保險股仍然有唔少限制，小小超個算盤打唔響不特止，喺香港同業激烈競爭下，營業額升幅減慢。
有知情人同伏勝講，盈保對小小超嚟講好似雞肋咁，加埋另一個大股東香港中國保險（集團）喺上個禮拜公布減持，搞到股價應聲下跌。
聽講班謀臣近排四出奔走，希望可以搵到新投資者入股，不過聽講反應一般。又有傳聞話佢哋有賣盤之意，有心人係國內嘅保險大哥。如果賣盤成事，會唔會應驗咗小小超上個禮拜揚言要減少本港投資嘅言論呢？
市場上另一隻已經好耐無成交嘅股仔御泰金融（555）上個禮拜突然好似鹹魚番生咁，每日成交額開始多番，喺上個禮拜尾段開始急升。伏勝本着每事求真嘅精神，八卦到有人想要御泰金融個殼，於是向大股東游說，雖然喺之前一段時間，個股市受到經濟環境惡化及沙士所打擊，令到證券業一沉百踩，不過由於隻股仔個殼較為乾淨，加埋貨源集中，所以個買家對佢嘅興趣頗大。
伏勝未八到邊個對個殼有興趣，但有啲做開殼股買賣嘅行家就話，一間好似呢類咁乾淨、貨源又集中嘅殼股，最少值成億。畀得起呢個殼價嘅公司，相信一定唔會係二打六，所以大家不妨留意吓隻股嘅發展。
伏勝