早排一人獨中七千萬元六合彩，好多人都想知道邊個咁幸運，日前竟傳出真命天子係沙田顯徑邨街市一個菜檔檔主，之後又傳出係四個檔口夾份買嘅，而該四個檔口又咁啱喺開獎翌日同時暫停營業，故中獎之說不脛而走。
八方為咗揭開呢個謎團，曾到顯徑邨嘅街市求證，部份檔主雖然聽到傳聞，但係就唔肯定邊檔咁幸運。其中有人手一指，話「好似喺嗰邊」，八方拿拿臨跟住指示走去一帶檔口詢問，但見檔檔都有開門營業，眾檔主對於查詢無不笑笑口說：「唔係，唔係呀，係就好囉，唔使再捱。」
不過，其中一檔嘅女檔主態度就好唔同，只係問吓佢係唔係中咗獎啫，佢就好𤷪咁鬧八方：「你唔好亂講，我俾人挾持就慘咯。」見女檔主咁緊張，似有古怪，八方實行打爛沙盆問到底，走去問隔籬檔嘅男檔主。女檔主立即好緊張，猛話：「唔好同佢哋亂講，費事麻煩。」八方以為有料到啦，點知男檔主解釋：「邊有可能呀，我哋買咗咁多年六合彩一次都未中過呀！」
傳真︰2623-9278
電郵︰