退休會計師Y先生，公認係好人，熱心提拔後進，為人所欽佩。前一輪，新進會計師X喺一個場合，碰到會計Y與一位溫文端莊女士同行，兩人態度親密，一望而知係一對愛人，但會計X覺得Y先生嘅女伴與自己嘅年紀差唔多，而Y先生係自己師傅嘅師傅喎！
會計X因此而向師傅請教。師傅教訓佢話：「咪大驚小怪，Y先生搵到年青伴侶，已有好幾年時間，雖然年齡相差起碼三十年或以上，人哋兩情相悅，關你乜事？其實呢位女士亦係專業人士，曾有不少崇拜者，但佢就係鍾意父執輩嘅Y先生，情之為物，往往不可以常理推度。
其實男女年齡相差遠者，未必唔好。今之金庸先生就好幸福啦，昔日錢穆先生何嘗不然，左丁山一位老師戰前失去妻房，戰後續弦，妻子只係佢嘅學生年紀，兩人遷台灣後廝守三十載，都唔知幾妥當。大概男人老後，好多生活起居都需要伴侶照顧，單憑女傭，係唔得嘅，有活力十足嘅太太代為打點，零舍精神，健康過同齡老人。當然話得說回來，假如老夫少妻嘅關係處理唔好，乜嘢事都會發生嘅。
現在已經係二十一世紀，西方個體主義深入東方人腦袋，個人選擇自由，旁人即使係父母，亦難以干涉，要干涉亦可能自討沒趣。最重要嘅係，個人自由選擇之後，要對後果負責，唔好一有事就賴三賴四。