金紫荊廣場氣勢有限，確係比不上天安門廣場。但前者勝在通俗，沒有喜歡跟天鬥更喜歡把人民鬥個死去活來的最偉大血腥總指揮毛主席的彩照，讓遊人鬆一口氣，旅遊不必像拜山，被迫向遺照鞠躬。但昆明豬仔團的內地領隊不忿氣，係要踩金紫荊廣場兩腳。明明是內地旅社鬼打鬼出蠱惑，內地領隊入晒香港數。千錯萬錯，不應該把內地客丟在金紫荊……聽落刺耳。
金紫荊話晒足金打造，幾時都唔失禮，絕非那隻一落地就跌跛腳的回歸寶鼎可比擬。金紫荊不是洋紫荊，傳教士N年前發現的香港之花，是絕子絕孫的稀奇不育品種。龍的傳人怎能斷香燈，是以棄洋迎金，一台像霧又像花的別扭雕塑坐地一擺，那個地方，面積細細，是天安門的1:99比數，也都成就了叫做廣場。
內地領隊還指責香港人不敬老。話晒二百幾人都是老人家呀。老人與海有緣，跟人心惶惶的維港浪人冇偈傾。香港老人有發牌權的，是隨時說政策不存在的董爺爺，和隨時評論七一遊行的紅頂商賈李伯伯。李鄭屋邨阿叔跳樓鬼睬佢。牛頭角下邨阿嬸做了董太抗沙士騷的臨記，酬勞並非香港澳門遊，而係兩隻口罩和一句搞笑贈言。千祈咪做豬仔老人。昆明老人團讀過老舍先生吧，老舍40歲在自傳寫道：教書做事均甚認真，往往吃虧，亦不後悔。如此而已。再活四十年也許能有點出息。老先生六六年自沉京城太平湖，終年67。