陳文媛（BoBo）喺今個月十八號啱啱過咗二十四歲生日，佢噚日連走三場，不過第一場開始就遲到，結果走到尾場時就遲足四十分鐘，重累朱茵冇得做壓軸表演嘉賓。
BoBo噚日原本喺晏晝一點到銅鑼灣嘅卡拉OK，同歌迷補賀生日，但佢成一點半先出現，第一場遲自然第二場又遲，原定佢兩點十五分要到中環，做Roadshowlive嘅記者會，但佢兩點半至到場，跟住佢又要喺四點去黃埔新城出席活動，最後佢遲咗四十分鐘至到場。
在場嘅新城台長朱明銳火都嚟埋，佢話BoBo再唔出現，就cut咗佢嘅演出，所以本來唱壓軸嘅朱茵惟有提早出場，好彩BoBo趕得切出現，重同朱茵猛咁道歉。
BoBo雖然衰遲到，但好彩重有緋聞男友陳冠希（Edison）錫番，BoBo話Edison已經打電話祝佢生日快樂，但就重未送禮物。
而Edison前晚喺銅鑼灣宣傳《無間道II》，講開近排BoBo同記者關係唔多好，佢話：「呢啲成日都有㗎啦，我喺機場出現，夠成日俾人話我黑臉啦。」
金城武同章子怡已經去咗烏克蘭拍電影《十面埋伏》，因為嗰度好窮，所以佢兩個連飯都未必有得食，真係有飯食飯，有粥食粥。今次係金城武入行之後拍戲最辛苦嘅一次，當地供電不足，好多時都冇熱水，而且天氣又凍，佢兩個有時重要沖凍水涼，所以話，做明星表面風光，拍戲、拍劇嗰種辛苦法，唔係個個頂得順。
孫燕姿早排話要休息一年，佢前晚同記者講話應該喺十一月就會開始休息，不過佢話只係暫時唔出唱片，不過接咗嘅廣告同宣傳活動就會照常。孫燕姿早排喺新加坡老家買咗間約五百萬港元嘅屋，𠵱家重裝修緊，不過佢話間屋得兩房一廳，所以想賣咗佢，再買間大啲嘅屋，女人果然係好善變。
張惠妹噚日出席台灣TVBS台慶演唱會嘅綵排，記者見佢屁股有紋身，阿妹話佢想紋咗好耐，但係一直搵唔到鍾意嘅圖案，直至見到呢個獅子頭圖案好吸引，所以就去紋。因為佢係獅子座，加上本身好細膽，但又成日想做啲好有挑戰性嘅嘢，今次紋身，就係為咗挑戰自己，睇吓自己忍唔忍得痛喎！
林心如喺螢幕上好似乖乖女咁，但原來私底下嘅佢好飲得酒，而且猜枚重好叻。佢噚日向台灣傳媒自爆因為成日要去內地拍戲，應酬又多，所以飲酒係少不免嘅。心如話開心就要飲，唔飲會好掃興，不過佢就強調自己酒品好好，飲醉咗最多都係瞓覺，好少出醜喎！
盧海鵬同李國麟噚日喺坪石拍攝電視劇《皆大歡喜》外景，兩位搞笑能手分別扮演朗拿度同碧咸，但係效果就認真麻麻，雖然李國麟已經專登整咗一頭金色頭髮扮碧咸，但成個中坑咁，完全冇得同萬人迷碧咸相提並論，而鵬哥扮朗拿度亦一樣唔似，連朗拿度嘅招牌牙罅都冇。
