郭富城噚日去咗沙田，幫某護膚品做宣傳，城城重同一名女模特兒即時做化妝示範，城城只係簡簡單單喺女仔塊面度掃幾吓，實行錦上添花咁話。
城城一邊同靚女化妝，一邊唔停口係咁講嘢，馮仁昭都戥嗰位女模可憐，城城係咁講，啲口水唔多唔少都會噴到佢塊面，但係佢又避無可避。唔知女模特兒化完個妝，係咪覺得塊面好似做咗保濕mask（面膜）一樣呢？馮仁昭覺得護膚品商不妨搵城城推介埋有關產品。
問到城城最欣賞邊位女星對眼，佢一味𠵱𠵱哦哦，有記者提到佢嘅舊愛鍾麗緹（Chirsty）同緋聞女友日本女星藤原紀香，城城尷尷尬尬咁話：「Chirsty個嘴好靚，紀香嘅眼形好靚。」
此外，有雜誌報道城城近日違例泊車被抄牌，佢話：「嗰時過咗禁區時間，而且我架係林寶堅尼，架車泊唔到普通位，咁啱嗰日酒店停車場滿晒冇位，呢次當係教訓。」馮仁昭覺得城城咁講有啲招積，抵畀人抄牌。
葉璇同蕭正楠噚日喺將軍澳電視廣播城錄影《橫掃千金》，葉璇話早前同肥姐到三藩市同紐約幫無綫宣傳，佢話：「同肥姐相處一個星期，發覺同佢好投契，大家又係上海人，連電話繩顏色都一樣，我哋搭飛機重一齊胃抽筋。」
問葉璇會唔會同肥姐上契？佢話：「我都係秋官（鄭少秋）個女啦！（葉璇係劇集《非常外父》入面扮秋官女兒），肥姐肯我就求之不得啦！」
王書麒噚日喺九龍塘舉行《王書麒小時候血淚史》新書發布會，其妻許秋怡同一班好友，好似吳家樂、趙學而同蔡立，就到場支持，而一直冇直認戀情嘅李永豪同楊思琦就不避嫌一齊到場。二人有講有笑，當記者要求合照時，佢哋都非常大方，李永豪重主動搭着女友膊頭。問佢哋有冇一起計劃將來，楊思琦話：「呢啲隨緣啦。」
古巨基噚日去咗美孚接受Roadshow嘅訪問，佢主演嘅電視劇《還珠格格Ⅲ天上人間》最近新聞多多，無綫將套劇調咗去六點鐘時段後，收視上升了一點（約六萬四千人），同時段對台嘅亞視新聞就跌咗四點，基仔話好開心喎。基仔重話呢排出街食飯時，有好多人叫佢做五阿哥，即係證明有好多人對套劇有興趣啦。
傅明憲噚日以愛護動物協會愛心大使身份出席「市民對公屋飼養寵物態度意見調查」記者會，佢話：「我以前住美孚私家樓，嗰度唔畀養狗，於是我就搬去住村屋，狗主要做番做狗主嘅責任，我提議如果啲人畀狗隻隨地便溺，就罰重啲二千蚊。」傅明憲又話希望房署畀啲狗主可以養到隻愛犬終老。
