隔晚美股急升，港股好友估話今回有運行，冇錯，但只係行咗一陣，恒指早段急升135點，到咗下晝，好似海鮮咁，早晚時價不同，反跌100點埋單。個市反覆成咁，就算股神畢菲特嚟炒短線，相信都要大叫睇唔掂。
滙豐（005）高低波幅1元，大藍籌中算佢最穩定。隔晚美國金融股大漲，刺激滙豐、恒生（011）等。最多人買賣嘅滙豐Call輪9845，收83仙，只得2仙進帳，全日高低波幅14%，12月初到期，𠵱家負溢價0.2%，槓桿率12.5倍。
第二大成交嘅滙豐Call輪9924，高低波幅20%，收46.5仙，反跌5.1%。呢隻係另類Call輪，溢價、槓桿率等數據要另外計算，唔容易了解實際情況。若然睇好滙豐，最直接做法就係揀9845，冇雜質，計法簡單，望住個大利是機，溢價與槓桿率係幾多就幾多，唔使再人工調整，總之滙豐點樣變化，9845輪價就跟到貼。
長實（001）高低價相差4元（6.8%），新地（016）相差3.75元（6.6%），和黃（013）相差2.25元（4%），中移動（941）相差0.80元（4%）。正股波幅尚且如此，啲窩輪上落急速兼大贏大輸，更不在話下。落場炒窩輪，記得限住注碼，同一注碼，以前可能需要3日先至贏或輸某個銀碼，𠵱家可能半日就搞掂。
章盛