雖然美股周四大升百幾點，但港股噚日高開低收，恒指收10968，跌100點，成交則激增至182.63億元，沽壓都頗大。好友重係靠托住隻滙豐（005）穩住大局，滙豐升1%，收103.50元，外圍傳出旗下Household會達到減少借貸成本目標。另外，摩根大通調高恒生（011）投資評級至「增持」，恒生升上90元，但美資繼續沽國企股並無手軟，換馬追捧滙豐及恒生。
國內電訊股方面，亦見有芬佬沽中移動（941）換馬買入聯通（762），其實聯通8月份營運數據唔算特別標青，但遲啲會引入CDMA低價手機搶客，可能威脅到中移動市場地位。聯通噚日升3.36%，而中移動則跌2.14%。
噚日基金大玩「乾坤大挪移」，主要是因為大摩中國及大摩香港指數成份股比重可能調整，聽講中移動及長和所佔比重會顯著調低，長實（001）及和黃（013）分別下挫4%及2.2%，而傳出其他成份股比重則有望調高，其中包括港交所（388）、合和（054)、永亨（302），以上三股都逆市上升。
國潤（175）以每股0.70元配售6.8億新股，集資4.76億元，用作增加浙江合資車廠的投資。據聞今次配售籌備經年，並已搵到足夠水源支持，所以噚日股價震到落0.70元配售價，就有大量買盤接貨，當收集得七七八八後，就會隨時開車。
思捷（330）宣布派高息，亦唔能夠支持股價不跌，而且重俾ING調低評級至「持有」，午市有唔少歐資沽盤湧現，唔知係咪代表思捷過去5年以來升浪就快結束？
阿虎