女人死晒都唔吼佐敦？
BlueLee開房錢唔慳得

英國男子組合Blue喺星期三旋風訪港十二粒鐘，我羅拉梗有去記招八吓啦！嗰日喺記招之後，我同隊中最受歡迎嘅阿Lee同Simon傾咗陣偈，阿Lee否認大堆不利傳言，佢話早前有傳佢同女伴喺廁所交歡單嘢係流料，阿Lee強調若果要同女仔交歡，一定去開房，真係坦白得緊要。

騷冧女紋身
阿Lee喺訪問期間，話英國嘅傳媒好鍾意將佢形容到成個花花公子咁，阿Lee話：「我唔明點解佢哋搞到我成個badboy咁，我根本冇喺康城同個女仔喺廁所鬼混，如果我有需要，肯定會開房！」
有個記者好多口咁問，如果呢個世界上嘅女人死淨巨胸名模佐敦（Jordan）一個，阿Lee又會唔會考慮呢？當其時阿Lee一開口就話：「OhNo！佐敦係個可愛嘅女仔，佢份工作又獨特。」
不過講到尾，佢都冇表態話肯唔肯喎，不過阿Lee喺臨走前重首次騷咗佢背脊嘅冧女紋身出嚟，佢話紋身呢家嘢其實好痛，不過為咗型仔都要死頂。