睇美式職業足球電視轉播，電視台介紹每名球員，除咗出現大頭相、姓名、位置之外，總會加插一句（由球員親自講）：「史密夫，佛羅里達大學」、「阿倫，俄亥俄州立大學」、「鍾士，UCLA」之類。
呢種介紹，在美國盛行，歐洲從來不見，你幾時見過足球員咁樣介紹自己：「碧咸，倫敦大學」、「奧雲，利物浦大學」諸如此類吖。點解美國觀眾咁重視球員出身嘅學校呢？原因之一係美國球員，幾乎全部出自大學球隊，可以直接講自己係乜學校畢業（至於成績就無謂再問嘞）；其次，美國人對母校有感情。美式足球球迷睇波之餘，知道邊位球員係自己同校師兄弟，就會親切好多，睇電視更津津有味，唔會轉台，甚或增加收視率。
所有美國大學都重視體育，不惜投下大量金錢，投資體育，美式足球隊更為重要，球隊教練薪水多過名牌教授。比賽成績好嘅大學，除咗名利雙收之外，更可利用球隊向校友籌款，左丁山識得一位社會科學教授唔係幾鍾意美式足球，但為咗籌款，一年總有幾次邀請名人或校友返母校睇波，睇完波就展開籌款遊戲，點知最近幾年，大學嘅球賽成績下滑，成日輸，搵人去睇波冇咁容易，教授話：「球賽成績好，校友捐款爽手，𠵱家成日輸，校友覺得冇面，唔多想返嚟睇波，搵佢哋捐款就難好多！」明乎此，就知道美國嘅足球文化，球員在電視上講：「湯美，喬治亞大學。」意義重大㗎。