福布斯噚日公布美國富豪榜，最有錢嘅華人係雅虎嘅楊致遠；而我哋第三屆特首熱門人選馮國經亦唔執輸，排名一百九十五。點解冇李嘉誠？原來呢個榜淨係計美國籍人士，Victor持有美國護照，所以呢次威過誠哥。
Victor喺美國就威，喺香港就始終暫時未能突圍。佢喺政治上一向唔高調，距離第三屆特首競選日子不遠，睇嚟係時候要發力。不過經過財爺競逐滑鐵盧，最後輸咗畀唐英年，睇來呢場仗都唔易打。加上政壇黑暗，啲暗箭都唔知幾時會飛埋身，𠵱家重攞住美國護照嘅Victor要突圍，睇來都要做啲嘢。
自從七一遊行，梁錦松辭職後，Victor一度成為財爺熱門繼任人，點知後來被人篤背脊，話佢同美國有不尋常聯繫，重話佢幫過CIA（美國中央情報局）做嘢。北京最忌呢啲嘢，Victor估自己可能冇行，先至公開發聲明話自己無意加入特區政府做全職工作。
話時話，老董未做特首之前，同美國嘅關係不比Victor差，上述傳言會唔會影響Victor競逐下屆特首，就真係要睇吓佢嘅造化。Victor做咗東方海外獨立非執行董事七年，同董家關係應該唔差，如果老董肯向中央保薦，相信可以增加佢嘅競逐本錢。
傳真︰2623-9278
電郵︰