世紀城市（355）、百利保（617）同埋富豪國際（078）早排炒得好厲害，3股股價已經先後由高位回落，但經紀陳話呢系股票應該未炒完，為咗完成債務重組，唔排除稍後或有批股集資活動。
3隻股票中，炒得最勁係富豪，佢由0.05元起步，炒過上去最高0.248元，噚日收0.18元，跌1.1%。百利保則由0.07元水平升上最高0.178元，噚日跌0.73%，收0.136元。至於世紀城市曾經脫離仙班，最高見過0.106元，噚日就收0.068元。
噚日呢系公司派成績表，兩間賺錢一間仍然蝕緊。世紀城市同埋百利保轉虧為盈，雖然一間係因為有債券行使，另一間係因為有回撥，都係會計上的技巧，但經紀陳就話唔重要，最緊要係公司前景有得憧憬同埋炒起上嚟有勢，咁樣無論炒作同集資都會事半功倍。
另外，江山控股（295）噚日股價忽然勁升20%，收0.036元，但成交金額只得20萬元，只屬亁升，所以小初並冇理。經紀陳話，隻股有賣盤傳聞。不過，據融資界嘅年輕賓架話，單deal唔易傾成。
慕容小初