港股周四走勢唔多妥，恒指靠滙豐（005）單天保至尊，結果只跌70點，但期指收市大低水64點，形勢有啲不妙，不過周四晚睇見美股強勢升破小雙頂，杜指及納指再創今年新高，趙飛雲諗住淡友今鋪又中伏，噚日俾好友挾餐死。
點知實際情況又唔係，恒指噚日稍為升破11200就全面回落，淡友實力似轉強。尾市長實（001）、和黃（013）、新地（016）及中移動（941）被狂質，好似有人要錢唔要貨，趙飛雲當時以為出現沙士新症。恒指最後收10968，跌100點，如果唔係滙豐同恒生（011）力撐，恐怕唔止跌咁少。
滙豐咁強，相信大家都知因為大摩出報告推介，建議增加投資組合內比重，噚日高見104元，收103.50元，升0.50元，再創今年新高。至於長和、新地及中移動突然沽壓大增，市場傳言亦同大摩有關，據講大摩中國指數同香港指數會調整成份股比重，將降低長和、新地及中移動的比重，由於大摩吹笛會有好多芬佬跟，所以噚日唔知係咪有春江鴨偷步，搞到4隻大藍籌突然沽壓大增。
恒指日線圖噚日再出現「穿頭破腳」利淡訊號，雖然仍險守20日線及短期升軌，但綜合其他技術指標，短期出現調整下試10500機會高達7成。美股周五晚「3重結算」，估計走勢唔會差，加上地產及電訊股噚日跌得重，下周一恒指有機先作反彈，可候升近10日線（現處11031）附近買1注恒指Put輪9063，以升穿11242止蝕，博恒指反彈受制於10日線，回頭下試10500，以150點博600點，計落博得過。
現時造淡最大憂慮是滙豐初現突破，近日盤路所見係散戶沽貨，大戶接貨，通常出現呢種現象，後市都係利好股價，若滙豐升破105元，升勢可能加快，買咗Put輪要留意。
趙飛雲