今個月至揪得嘅肯定係《真．三國無雙3：猛將傳》，代理剛剛喺星期三派咗貨，足足比日本正式發售日早成個星期有多，而且今次隻Game並冇好似上集咁炒高，坊間都係賣$260至$280左右。雖然只係加強版，但係3嚿水唔使買到就真係抵玩。首批中文包裝版重加送人物方塊磚，可惜賣相麻麻。
等到頸都長嘅NokiaN-Gage會喺10月7號全球開售，代理已陸續將樣辦畀傳媒測試，而前排Nokia亦有將樣辦送過港Game舖試反應，相信到時Game舖都會有得賣。鐵人試過部機，機能同畫面真係有PS級數，而且部機對戰完全唔覺有遲緩嘅情況，如果遊戲數量夠多嘅話，相信搶到唔少GBA嘅客。
美國蠱惑仔遊戲《GTA3》下星期四喺日本登場，香港都會有貨返，定價6,800日圓（約港幣$380）。而之前對應眼罩形電視嘅《ENGRYAIRFORE》，其續篇亦會喺下星期登場。