歐洲足協前日證實，喺下月進行嘅歐洲國家盃附加賽抽籤唔會用種籽制，咁即係話，明年決賽周分分鐘唔見咗幾支強隊。
如果行種籽制，強隊同強隊喺附加賽就一定唔會碰頭，但歐洲足協話為咗公平起見，決定喺抽籤嘅時候唔用種籽制；等強隊有機會抽到對弱隊，亦有可能抽到對強隊。換言之，原來諗住喺附加賽對硬弱隊嘅荷蘭，𠵱家隨時執到對西班牙或英格蘭。
其實我求大俠都好贊成歐洲足協咁做，事關好似威爾斯同蘇格蘭呢啲實力唔強嘅球隊，變咗有機會殺入決賽周，唔會淨係陪跑。但世事冇完美，荷蘭同西班牙呢啲強隊，就可能成為公平原則下嘅犧牲品。
邁阿密熱火近年成績每下愈況，每年重蝕成三千幾萬美金，熱火高層最近就宣布除球員外，今季所有員工減薪一成；總裁兼教練萊利身先士卒，佢嘅年薪成五百萬美金，減一成就冇咗五十萬，咪話唔肉赤。熱火減薪係迫不得已，不過啲高層都算有良心，一視同仁！
歐洲足協官方公布，前晚歐冠盃幫祖雲達斯射成二比一嘅係費拉拿，不過呢位老將賽後話佢無掂到個波，應該計開罰球嘅迪比亞路至啱！我求大俠都見到呢個波並唔係直接射入，但就算唔係費拉拿，都應該係對方後衞擺烏龍，點計都唔係迪比亞路，咪亂幫自己友噃！
喺歐洲踢波嘅四名南韓兵前晚一齊出戰歐冠盃，今季加盟皇家蘇斯達嘅李天秀，雖然後備上陣，但就成為唯一球隊贏波嘅幸運星；至於恩浩雲嘅李榮杓、朴智星，同安德烈治嘅薛琦鉉，就全部輸晒。睇嚟李天秀好快可以趕上隊友，成為歐洲最受注意嘅南韓球員。
我求大俠早前話德國喺國際賽累街坊，估唔到連佢哋班霸拜仁亦一樣。拜仁前晚最後讓些路迪一球?球半，但只贏二比一，累捧場客輸半；今屆佢哋打咗七場，亞洲盤路一贏四輸兩走盤，捧佢真係輸甩褲。我哋嘅名家青蛙仔聽日重捧唔捧佢呢？記住睇《蘋果波經》啦！