金像影后荷爾芭莉（HalleBerry）貴為荷李活首席黑人女星，聲勢絕對唔弱得過妮歌潔曼（NicoleKidman）同金美侖戴雅絲（CameronDiaz）等頂級白人女演員，好多性感女星選舉佢都脫穎而出，證明佢的確有唔少fans！不過最近荷爾芭莉喺新片《Gothika》入面就洗盡鉛華，扮成一個頭髮蓬鬆、好似老咗十年嘅女囚犯。
今次係荷爾芭莉首次拍恐怖鬼片，而繼舊作《極速暴劫》同《孽愛傷痕》之後，佢喺《Gothika》入面又有一場同一班女犯人出浴嘅場面，自然少不免要露吓點，咁多噱頭聽落都幾吸引。
由於呢部恐怖片着重營造氣氛，相對唔需要用咁多特別效果，所以即使今年三月先開始籌備，四月至喺蒙特利爾開鏡，但六月已經拍完，下個月正式上畫，真係快過打針。
講番《Gothika》嘅故事內容，荷爾芭莉飾演精神病醫生，有一晚雨中揸車遇到一個好得人驚嘅少女，重搞到暈咗，醒番之後佢發覺自己俾人困喺平日佢工作嘅精神病院入面，重被控謀殺親夫㖭！
荷爾芭莉嘗試搵番自己嘅記憶，不過佢同時又受到死唔眼閉嘅鬼魂操控，相信要到電影開畫，先知荷爾芭莉可唔可以重獲自由！