𠵱家發展商興建寫字樓，除咗將所有高科技智能化嘅嘢，同埋環保概念擺晒入去之外，更講求人性化、更貼身嘅設計同管理服務。
信和九龍灣宏天廣場，四方外形設計，相當實用。此外，發展商考慮到唔少女士去洗手間時，多數會帶埋化妝品、手袋等，所以每層嘅女洗手間內，都安裝咗幾十個小型貯物櫃，方便佢哋臨時存放個人物品。就算喺甲級商廈，或其他新落成寫字樓都唔多見有呢項設施。
另外，發展商因應新租客搬入時，有各種各樣嘅商務需要，提供如預訂旗下酒店場地開會、服務大使同秘書服務等支援外，同時又有穿梭巴士往來九龍灣地鐵站同尖沙嘴。喺非辦公時間，重會以八達通卡限制出入宏天廣場嘅人，加強保安。
旺角快富街有一段專賣建築材料，其中一個舖位，喺四個月內三度易手，升值兩成七。
利嘉閣測量行店舖部助理董事戴錦輝話，呢個舖係快富街二至六號地下1C，五月底以三百萬蚊交吉售出，買家喺兩個月內即以三百二十三萬摸出，賺咗二十三萬。到前日，個舖又再易手，成交價升到三百八十萬蚊。
個舖喺第二次轉手時，以月租二萬五千蚊租咗畀個區內客，作擴充之用，計落新買家有七厘九回報，都算唔錯。
地產代理賣一手樓各出奇謀，美聯之前有做過話劇宣傳，今次賣逸樺園，重拍埋音樂錄影帶，製成VCD，將譚詠麟嘅名作《我愛大自然》，重新填上歌詞，改編成《我愛逸樺園》，由美聯幾位歌喉了得嘅經紀負責主唱。
隻VCD製作相當認真，除咗有經紀錄音花絮外，重拍攝咗逸樺園嘅示範單位、外貌、周圍環境同設施等，好有參考價值。
太古馬淑貞話，要攞番幾隻VCD返去畀同事睇。佢同美聯幾位董事重即席喺隻VCD上簽名。
發展商宣傳樓盤活動愈來愈出位。長實同新地嘅長沙灣宇晴軒，噚日開放全新兩房示範單位畀傳媒睇。示範單位定位非常清晰，就係以BB做主題。長實搵嚟兩個外籍BB做model，喺BB房裏面嘅波波池大玩特玩，重任影唔嬲，果然專業。
除咗呢兩個超級可愛BB外，現場另外擺咗四幅BB相，原來分別係執行董事趙國雄、高級營業經理郭子威、滙豐嘅羅康平同埋設計師何定豐嘅千金同公子，讓大家玩配對遊戲。
趙生個仔着咗件類似老虎嘅公仔衫，造型得意。形象百變嘅趙生笑言「虎父無犬子」，連仔仔扮相都維肖維妙。
另外，新世界上個禮拜去上海做何文田君頤峰路演，同二十家代理會面，計劃下個月再舉行巡迴路演。
產業署早排將山頂道同白加道交界嘅更亭招租，個單位五百九十二方呎，上個月叫租每月九千蚊，點知放盤成個月都冇人吼，唯有減租到八千蚊。
呢個更亭喺政務司司長曾蔭權官邸對開，上手月租係八千蚊，可能睇到近排個市有啲起色，所以決定加租，點知最後要減租收場。
蘭西認為，呢啲另類單位，有別於主流市場，唔可以用市場交投嚟做參考。
蘭西
電郵地址：
