記得四五個月之前,經紀陳曾品題過信利國際(732),話可以憧憬業績正斗,當時信利股價約為2.90元,但隻股街貨唔多成交極疏,買賣不易,故此小初冇乜再理。
點知噚日望一望,原來股價已經上咗去4.80元,係一年高位,真係走晒雞。
經紀陳話,雖然信利業績對辦,股價又確係升咗唔小,但可惜成交量仍然唔夠大,交投太疏始終係炒股大忌。
信利上個月公布截至今年6月底止中期業績,純利有成5840萬元,比去年同期升27%,兼夾有7仙息派,可以見得人。
經紀陳話,眾所周知,信利街貨由一位大戶坐晒咁滯,呢位仁兄一日唔沽貨,芬佬一日都唔敢掂,呢個亦係隻股未能成大器嘅主因,小初不妨問吓佢要乜價先至肯割愛?小初心諗,經紀陳實在太睇得起小弟啦。
另外,早幾日提過友利控股(419)批股,今次就輪到個仔天地數碼(500)批股,聽講好似話今日會停牌,下周一先復牌。
慕容小初