胡兵及其緋聞女友瞿穎日前來港宣傳新劇《真情告別》，胡兵更無懼傳言，主動為瞿穎借Fendi名牌做行頭，但提到去年李亞鵬棄瞿穎而與周迅拍拖，胡兵則直指李亞鵬有錯，還揚言與對方永無合作機會，他說：「有我就冇佢！」
胡兵首次有份投資、監製及主演之內地劇《真情告別》將於亞視播出，日前胡兵與劇中女角兼其緋聞女友瞿穎來港，為《真》劇做宣傳，雖然二人緋聞傳得甚囂塵上，但胡兵卻無懼人言可畏，來港後向贊助其衣服的名牌Fendi攞衫時，更為瞿穎攞埋一份。
胡兵及瞿穎的緋聞盛傳多時，但日前他在尖沙嘴接受訪問時，則揚言不會與對方拍拖，他說：「瞿穎係一個好女仔，但我哋太熟，佢就好似我嘅親人一樣，所以唔會拍拖。」
瞿穎之前與國內劇集《笑傲江湖》中飾演令狐沖的內地小生李亞鵬拍拖，但有傳因周迅介入，而令瞿穎黯然退出。
但近日周迅與李亞鵬又宣布分手，胡兵對此只說：「我覺得係嗰個人唔啱，瞿穎為咗佢，幕前啲嘢都唔做，日日留喺屋企煮飯，我對嗰個人不願置評，我信天會睇到，睇下個女仔最後點對佢就知啦。」
問到胡兵將來會否拒絕與李亞鵬合作？他笑說：「我以前冇同嗰個人合作過，以後都唔會，有我就冇佢！」
有內地報章指上月胡兵與李亞鵬在北京一拍賣會狹路相逢，當時李亞鵬指着一條及膝裙，提議胡兵購下，但胡兵卻勁寸對方說：「我女朋友好高㗎（瞿穎身高175cm）。」登時令李亞鵬甚為「冇癮」地行開。
胡兵對此則鬼馬地笑說：「嗰日我係自己同自己講嘢，我都冇女朋友，隨口講吓都得啩，我唔知嗰個人聽唔聽到喎，冇嘢怕乜俾人講啫。」
此外，《真》劇最近在大陸已推出漫畫本，胡兵對銷量及書內造型大感滿意，他表示，現時正洽購此書之台灣及香港出版權。
採訪、攝影：朱倬誼
