家福道：
地膽王太推介擺花街街市鮮雞最靚

超市冰鮮雞大行其道，最近又推出甚麼冰鮮三黃雞等，本地雞販為應戰，引入極品的清遠雞、龍崗雞、本地大雞等，以肉質鮮為賣點，正面和超市的冰鮮雞宣戰交鋒。要買最靚鮮雞，讀者王太首推中環擺花街街市是一個好地方。

記者：伍旋卓　攝影：陳陶鈞
逢星期一至五出版

很多半山區的人也會特地走到擺花街街巿買菜，因為呢度鮮雞最靚。王太首推渭記（永祥）雞檔，重話要買靚雞愈早愈好，因為早上未夠十一點渭記的鮮雞便賣個清光，很多人在下午慕名而來，渭記都已經關門了。

親自攞貨　日賣過百隻雞
渭記老闆高太表示，現時檔口只會揀選三種雞出售，也足夠應付大部份顧客的需要，包括清遠雞、龍崗雞、本地大雞，平均每日賣過百隻。為找到合心水的貨色，高太每日凌晨三點必會親自走到批發商揀靚雞。

唔同雞種食法不同
有人說清遠雞肉質不夠爽，其實只是入貨時的品質未夠好。高太話：「以清遠雞來說，皮薄肉質較實，適宜煲湯和做白切雞。而龍崗雞皮肉較厚，肉質比清遠雞更甜，其水準更是冰鮮雞中的三黃雞之上。至於本地大雞，主要較為肥身，最細都兩斤零，其肉質較甜，是黃油雞的一種，可直接做海南雞和豉油雞，如果要做完隻炸子雞的話，就必定要選用本地大雞。」

渭記（永祥）雞檔
結志街16號


鮮雞和冰鮮雞分別：
1.檢查頸：新鮮雞即叫即劏，一定會有鮮血，不會留有黑色的瘀血。
2.檢查雞眼：新鮮雞的雞眼通透明亮，而冰鮮雞的雞眼會有一片白膜，而且會有少許凸出。

靚麵豉醬此中尋
在擺花街的成裕泰雜貨店有至新鮮的麵豉醬，王太今次要示範的湛江傳統煨雞就指定要呢種麵豉醬，因為貪佢味道夠鮮，內裏的黃豆粒非常肥大，用來醃雞入味會比一般麵豉醬快。（結志街19號）

湛江傳統煨雞$67
湛江傳統煨雞是用少許清水和醬料將雞煨熟，其中用醋可令雞皮爽滑，麥芽糖則可令雞皮有脆口感覺。王太表示，煨雞最難的地方是風乾過程，醬料太稀雞唔入味，太濃又怕搶過雞肉味。王太又話，傳統煨雞是以大鑊煨製，但如果選用新鮮雞，簡單可以用微波爐做到，選冰鮮雞的話，肉質會散發一種雪味，而且雞皮會不脆。

用咩料：
龍崗雞 1隻
葱 2條
蒜頭 5粒

醃料：
豉油 3安士
麥芽糖 3湯匙
黑醋 1湯匙
酒 2湯匙
胡椒粉 1茶匙
麻油 1湯匙
麫豉醬 2湯匙

好易煮：
1.將雞洗淨，拍扁葱、蒜，連同醃料醃至入味，取出置通風處稍風乾約1-2小時。
2.用慢火煎一煎雞，約1-2分鐘，直至雞皮呈現金黃色便可。
3.用牙籤在雞身拮些洞，放大碗中蓋上微波爐保鮮紙，加熱10分鐘。倒出雞汁，雞外脆，內裏肉質鮮滑，就是湛江傳統煨雞的特色。

小貼士
1.醋是一個非常重要的調味料，除了可以辟走雞肉的腥味外，最主要可以令雞皮變得爽口，吃起上來就如煨出來的雞一樣。
2.買新鮮雞一定要檢查雞肺是否除去，一旦雞肺留在雞內，便會久煮不熟，而且雞隻會滲出血水，很難控制火路。