新人吳浩康最近出咗碟，佢所屬嘅MusicPlus唱片公司今次特登喺新巴同九巴買咗一個月嘅廣告時段，播放吳浩康首新歌《先入為主》MV。
但係點知個MV播咗三日左右就抽起咗，皆因巴士公司接到廣管局通知，話嗰首歌嘅MV尺度有問題，因為吳浩康喺MV裏面高空擲物，佢喺約六層樓高嘅地方將成張梳化、成個雪櫃同衣櫃丟落街，佢哋恐防會教壞細路，而且高空擲物係違法嘅，所以要抽起唔准播。
其實劉德華舊年幫Baleno拍廣告嘅時候，就試過成個櫃掟落街，之後亦同樣遭禁播，估唔到今次吳浩康好學唔學，重掟多幾件。
MusicPlus由於買咗一個月廣告，𠵱家首歌要抽起唔播得，於是惟有臨時變陣，改播另一首新歌《討厭》，呢首歌嘅MV就靜好多，吳浩康只係踩吓單車同坐喺度扮吓憂鬱咁，包保唔會犯禁啦！至於點解之前咁激，皆因導演想表現年輕人衝動嘅情緒。
莫文蔚（Karen）噚日喺台灣被邀請做「離島商圈親善大使」，佢話參與呢啲活動係出自真心，Karen用國語話：「熱心公益是講『心』，不是講『金』的。」Karen又話喺香港，佢成日都有做呢啲公益活動，佢重話唔好趁做公益賺錢咁話。
成龍噚日以電影大使嘅身份到會展出席「香港國際影視展2003」記者會，成龍喺會上話自己已持多咗嘉禾股份，重話如果股份再多嘅話，就踢埋鄒文懷走㖭，佢重誇口話只要一撻成龍個名，佢嘅片幾乎都唔使俾內地審查，因為佢嘅電影夠健康喎。
郭富城同陳奕迅前幾日喺山頂拍攝電影《重案黐孖GUN》，導演為咗令場面更加搞笑，專登加咗場打台灣牌嘅麻雀戲，等佢哋即場可以露兩手，兩個人聽到之後，立即成個人生猛晒，郭富城重好抵死咁同導演話：「𠵱家好多人都打台灣牌，你快啲去學喇！」
男子組合Boy'Z噚日同近百歌迷一齊到金鐘出席「飛嘗體驗昆士蘭」活動，Boy'Z會喺下月啟程去昆士蘭兩個禮拜拍攝旅遊特輯，不過兩人都係首次到昆士蘭，Kenny（左）話十分期待，因為可以試吓跳降落傘等刺激玩意，反而一向活潑好動嘅Steven就即刻耍手擰頭，重自爆曾經玩機動遊戲玩到嘔，而且重係一路玩一路嘔，認真核突。
