張曼玉與梁朝偉這對緋聞男女，早前又再約會撐枱腳歎十四頭鮑魚。縱使二人的緋聞傳得鬧哄哄，但張曼玉昨日堅稱今後仍會繼續與梁朝偉約會食飯，又指二人的緋聞似故事已開了頭，大家要繼續追落去。
張曼玉（Maggie）早前與緋聞男友梁朝偉相約在銅鑼灣富臨飯店晚膳，大歎十四頭鮑魚，昨日Maggie在深灣出席「玉寶表」記者會，提到與偉仔撐枱腳一事時，一臉從容地說：「呢啲真係好八卦嘅緋聞，我覺得我係唔會唔同偉仔食飯同見面，咁多年都係咁，只不過呢兩年大家比較敏感，呢個故事start（開始）咗就要追落去，成件事就係咁簡單，我同其他男士都有食飯，大家唔覺啫！」
「佢係數一數二演員」
Maggie多年來與導演王家衞合作無間，近日偉仔在王家衞穿針引線下，極有機會與荷李活女星妮歌潔曼（NicoleKidman）合作拍電影，該片將由王家衞執導。對此Maggie昨日說：「妮歌潔曼係我好欣賞嘅演員，佢係世界數一數二女演員，假如合作得成，我都戥王家衞開心，自己有冇機會參與演出冇所謂，能夠去到探班都好開心。」
而對於無綫近日有意重拍劇集《新紮師兄》，當年由Maggie飾演的穎之一角，則屬意由容祖兒或Twins的鍾欣桐演出，對於這兩個人選，Maggie說：「好多人都可以演呢個角色，最緊要係放低靚樣，唔好用我演嘅角色做標準，唔好似我。」
此外，梁朝偉、楊千嬅、葛民輝、黃婉伶（Race）、徐天佑和張震等，昨日偕同導演馬偉豪和監製王家衞齊往銅鑼灣，為新片《地下鉄》舉行開鏡拜神儀式。
「我日日都食飯㗎啦」
偉仔被問到繼早前與緋聞女友張曼玉歎鮑魚後，日前再相約同居女友劉嘉玲到同一飯店再歎鮑魚一事時，偉仔笑說：「我日日都食飯㗎啦！」再問偉仔此舉是否為補鑊？偉仔只說：「黐線！」
問到偉仔可知王家衞正計劃促成他與妮歌潔曼合作一事時，偉仔詫異地說：「唔係吓話？有機會當然係好啦！咁出色嘅演員有機會合作都相當好玩，佢嘅戲我都睇好多，《大開眼戒》都好鍾意，但係我唔明一個外國人嘅題材，點樣加入中國人演嘅故事。」
主演幾米《地下鉄》
而偉仔與千嬅合作的新片《地下鉄》，是繼由梁詠琪與金城武主演的《向左走．向右走》後，另一齣改編自幾米繪本的電影。偉仔與千嬅在片中扮演失明人士，二人為演繹好戲中角色，將會到盲人中心學習，千嬅說：「去盲人中心係要留意佢哋嘅動態，了解點去演繹呢個角色。」
採訪：陳月萍
攝影：仇志德
