左丁山舊老闆好鍾意投資酒店，以前由瑞士以至大溪地，佢間公司都有投資喺酒店物業。唔見佢好幾年，最近先知道泰國嘅萬豪酒店（Marriott），佢間投資公司都有股份。
酒店通常有兩個主角，一個係業主，一個係管理公司。業主多數係國際投資者或當地地產發展商，管理公司就幾乎一定係跨國連鎖集團如希爾頓、凱悅、萬豪、洲際等等。一間酒店做得好唔好，大部份責任落在管理公司身上。酒店管理公司視乎各地成本，管理酒店嘅手法唔多相同。小YY去咗瑞士讀HospitalityManagement，最近講起：「喺歐洲讀management，返亞洲學hospitality。」聽落唔多明，向最近自曼谷返嚟嘅酒店董事Y請教。董事Y話：「好容易解釋啫，歐洲美國嘅人工貴，酒店盡量避免請太多員工，兼且歐洲的老牌酒店歷史悠久，員工年資長，薪酬福利累積到高水平，點可以請太多人吖。酒店員工比較少，盡量利用科技，加強管理，先至可以賺錢，至於對客人服務，無微不至咯喎，邊度夠人做呀，除非你係保羅麥卡尼啦。喺曼谷馬來西亞啲大酒店就唔同，員工對人客比例高（固薪資比較低），兼且訓練好，同樣係跨國酒店管理，喺亞洲就細緻好多。你住過曼谷文華東方麗晶，再去住吓紐約四十二街嘅君悅，就知道hospitality嘅分別嘞。」呢個解釋都唔錯，想深一層，最深層嘅理由，都係錢作怪。