新車速報：<br>新版富士LegacyB42.0GT內外大變身

新車速報：
新版富士LegacyB42.0GT內外大變身

向來以AWD高性能房跑車作賣點嘅富士Legacy車系，香港代理剛運嚟全新LegacyB42.0GT型號，不僅外形較同級一眾日本車款，要來得俊朗富活力感，細微處更展露有歐洲車風範，匹配一台全新2.0公升水平對向Turbo偈及Close-ratio嘅5前速半自動波箱，響強化嘅底盤結構下，演繹出一份驍悍跑車風味呢！

記者、攝影：陳偉林
逢星期一至日出版

外形剛強帶歐洲車個性
新車線條簡潔流暢之餘，新設計嘅鬼面罩，匹配上一對炯炯有神嘅Xenon大燈，還有大型氣霸連霧燈配搭，重有加添上方向指揮燈嘅門邊電鏡作組合，早已烘托出一份堅毅不屈嘅豪情；而新一代Legacy改換上簡潔車尾配搭，更能予人體驗有多一份歐洲車氣息呢！

■一對Xenon頭燈炯炯有神氣，添上霧燈點綴，別具一份惡形惡相氣息。

■兩邊車身線條流暢悅目，匹配加有方向燈嘅門邊鏡配搭，望落倍見奪目出神。



強化引擎底盤　演繹出眾
新車尺碼明顯擴闊，惟車重卻跟舊有型號相若，全有賴頭冚用上鋁合金製造外，車尾廂更用上大量塑膠物料鑄造，可有助減磅之餘，廠方為強化底盤結構，前後還裝有鋁合金搖臂，加上一台水平對向缸體高度更下調22mm，以強化低重心嘅效果。新Legacy放棄原有雙Turbo配搭，改換上鈦金屬製嘅單一渦輪組合，既耐高溫又輕巧，匹配上引擎內裝雙AVCS系統同VVT設計，令扭力峯值響2400rpm低轉下發揮至極點，新車既有動態一面，而高速疾走下亦見步履穩紮兼且循迹性高㗎！

■全新車頭鬼面罩添有電鍍邊修飾，看來有霸氣之餘亦見溫文爾雅一面。

■全新17吋跑車合金胎軨配搭，時款有型又見活力感。

■鴨尾狀嘅車尾設計，別具有定翼嘅穩壓作用，令行車倍見平穩。



設備講究　非比尋常
除造型一新耳目外，座艙鋪排亦可謂屬革新設計，以雙色絲絨料配襯嘅兩排座席，響鍍鉻面板跟黑色真皮鑲嵌下，望落既High-tech又烘托出一份跑意，最教人驚喜會係一套原廠高級CD連MD音響，重有恒溫冷氣同雙安全氣袋組合㖭！

■液晶體表板悅目又井然，外框有紅圈更感有辛辣味。

■新款三幅式跑車軚環把持恰到好處，兩旁重有+/-半自動波按鍵。

■全新5前速半自動波箱，屬跑車化Close-Ratio組合，轉檔反應順暢利落。

■全新配搭嘅中控台，既有高級CD連MD裝置，又有恒溫冷氣跟頂置儲物匣。

■全新車廂陳設豪邁奪目，空間既寬敞又見舒適性。

■以人體工學設計嘅兩邊門鏡，按掣隨手可及又愜意。

■後排空間寬敞之餘，重備有獨立頭枕、三點式安全帶裝備及大型手枕，另外重有活門直通尾廂，方便提存物件㖭！

■原廠電天窗前後有獨立照明裝置外，兩旁重備有出入扶手安排。

■闊大嘅尾廂地台下，另備有雜物匣，擺放物件至愜意。

記者試後評語：性能出眾循迹性強
新車賣相吸引富跑意之餘，重別有一番歐洲車氣息；改用回單Turbo跟水平對向2.0公升偈組合，加速表現線性又強悍，跟引擎內附DualAVCS及VVT結構有一定關係。再者，將引擎位置下調22mm，有助提升低重心要求，令快跑時亦有出眾循迹感。

■新車用上一台全新2.0公升Turbo偈，輸出跟舊款相若，惟低轉更見勁度又見加速凌厲。

富士LegacyB42.0GT
引擎：1994cc水平對向四汽缸DOHCTurbo
馬力：260ps/6000rpm
扭力：35.0kgm/2400rpm
傳動：5前速半自動波，恒式四驅
懸掛：（前）麥花臣支柱（後）多連桿
制動：（前）透氣碟（後）透氣碟（ABS）
輪胎：215/45R17BridgestonePotenzaRE050A
尺碼：4635×1730×1425mm
軸距：2670mm；車重：1440kg
平均耗油：13.0km/L
新車售價：$368,000
車輛提供：意美汽車（23968380）