唐唐腳頭好，六月至八月份失業率，由百分之八點七大幅回落至百分之八點六，唐唐一上北京述職，即時見功，一直好擔心個仔仔理財唔掂搞到要俾香港人打小人嘅唐母太夫人，扶住支龍頭枴杖，應該放心飲得杯落。
國家開放自由行，用到人海戰術同唐唐打通經脈，除非美國佬整蠱，秋涼之後再喺香港鬧市放沙士病毒（國內嗰個人民網好多網民都係咁認為，話沙士係美國佬研製嘅生化武器），加埋喺愚人節嗰日跳樓殉港嘅哥哥在天之靈庇佑，九月呢一季嘅失業率，應該會繼續大幅下降，唐唐日日鬼咁好笑容，睇嚟唔係做騷，而係發自內心嘅歡樂。
十．一黃金周，淨係廣東已經有六萬人準備撲落嚟消費，啲酒店食肆爆到冚，尤其係啲金舖，內地啲師奶太太團入去揀金鏈，成班老公見到商店告示不准吸煙，以為金舖老細真係講法治落力執行，一個個踎喺金舖門口，一路煲煙，一路𢱑痕，已經成為鬧市一景。
其實啲遊客男同胞唔使咁文明喎。香港人睇錢份上，做生意出名靈活，珠寶店內話就話不准吸煙啫，啲祖國遊客咁有錢，售貨員又點會咁歧視同胞，要班財神踎街吞雲吐霧呢？市面舖頭好多禁煙告示，已經好似國家憲法裏面保障人民言論出版自由咁，變成一紙空文嘞。
講開自由行對經濟嘅影響，喺九龍山東街同豉油街交界，有一個熟食市場出晒名係北姑出沒嘅花街，平時好多三行佬同未夠鐘開工嘅果欄工友，喺嗰度行行企企昅女嘅。
自從自由行之後，
北姑既然落嚟搵食，兜搭對象本來梗係港男，一宗生意三百蚊，咁先至可以搵快錢。港大一位唔願意透露姓名嘅經濟系教授話畀八方知，若果啲內地男同胞遊客愈企愈多，就會出現人肉市場嘅範式轉移，即是話好似呢期《壹週刊》報道有港姑遠渡倫敦搵食咁，慢慢就會吸引本地嘅港姑港嫂，喺呢個街口向自由行嘅內地男同胞拉客，用人民幣交收，咁啲北姑就會慢慢淘汰嘅嘞。
若果咁嘅一日好快來臨，李少光就可以鬆一啖氣。十．一黃金周喎，有名你叫，香港旅遊業有金執，但警方同時又要加強掃黃呢。自由行真係畀到我哋好多有趣嘅啟示，唔知阿董吩咐前任財爺阿蟲推動嘅高科技經濟轉型，會幾時見功呢？
傳真︰2623-9278
電郵︰