大市前日升69點，昨日回落70點，兩日計埋算係打和。重磅股中，和黃（013）前日升0.75元，昨日跌1.25元，可以諗吓博追番上去，亦可博同長實（001）拉近番些少。前一排長和同價，𠵱家和黃低過長實5大元。
和黃有兩件Call輪可以考慮，9757同9914。9757收82仙，單日跌幅9%，明年3月到期，溢價3.2%，槓桿率7倍，有差不多半年壽命，槓桿率唔低，溢價吸引。9914收51仙，單日跌幅12%，明年1月到期，溢價5%，槓桿率11.2倍，壽命稍短過9757，但槓桿率大好多，溢價唔算高，隻輪交投旺，好多短線客炒出炒入，1個價位已經有菠蘿包利潤。
太A（019）昨日跌得較急，收44.20元，唔見1.40元，幅度3.1%，大過恒指跌幅好多。太A神神化化，波幅有時比較誇張，吼低位博反彈，買Call輪9877。隻輪年底到期，輪價81仙，溢價0.5%，槓桿率5.5倍。另1隻太ACall輪9660，明年1月到期，輪價1.07元，溢價0.9%，槓桿率4.1倍，數據冇9877咁靚，交投亦更疏。
九倉（004）平收19.15元，吼喺低位買Call輪9585。隻輪11月到期，輪價37.5仙，負溢價0.1%，槓桿率5.1倍，呢件波幅相對較細，爆炸力同殺傷力冇咁大。
章盛