章小蕙昨日在灣仔為珍珠首飾比賽任評判，有報道指她與呂良偉楊小娟夫婦不和，章小蕙反駁絕無此事，她更表示貼錢讓女兒嘉湄照顧呂良偉的兒子，加上她會買玩具給他們玩，可見兩個家庭關係十分要好。
章小蕙和設計師馬偉明等昨日在灣仔為「2003國際大溪地珍珠首飾設計比賽」任評判團，模特兒則示範以「水的印記」為主題的入圍作品。
日前有報道指章小蕙發福肚腩凸現，與曾傳不和的楊小娟呂良偉夫婦合照時又尷尷尬尬，三人生疏地勉強合照後，章小蕙即閃身欲急步離開，但楊小娟不斷打量章發福的肚腩，對此章小蕙表示現時體重一百一十六磅，合乎標準，她說：「冇發福喎，條裙低腰、鬆身同埋麻質料，影相效果係咁，如果再鬆身啲，咪話我三個月身孕，我出名『平』㗎喎！」她隨即鬼馬地指一指自己的肚皮。
章小蕙續說：「之前都傳過我同小娟不和㗎啦，嗰晚我本來約埋小娟去嗰個活動，不過佢整頭耐咗，我重叫司機車埋佢同阿呂去會場。」
報道指楊小娟怒目而視章小蕙？章小蕙沒好氣地說：「小娟話我件衫全季最靚咋，其實我哋一個星期見幾次，我個女係佢囝囝嘅baby-sitter（保母），我重出糧畀囡囡，每日十蚊，又倒貼買埋BB書、玩具畀佢哋玩。」
提到女兒嘉湄，章小蕙說：「我個女重成日叫我生個BB畀佢，呢樣嘢要排期喎，先要搵到個老竇先。」她又透露稍後將飛往紐約入貨，然後會到洛杉磯出席兒子嘉浚在軍校步操巡遊。
採訪：RitaLeung
攝影：ChanChiLam
