呢輪班忠心耿耿嘅港人蒙北大人寵召，排隊上京面聖，佢哋就去得高高興興，有啲重話見咗幾次㖭，真係唔怕熟口熟面。最慘嘅係班在京侍候佢哋嘅記者，等極都冇歸期。
有行家同八方吐苦水，話當日上京之前，剛好同女友一齊搬新屋，點知一搬完就上咗北京，個爛攤子就要由女朋友負責搞掂，真係唔好意思。
本來以為做埋班女人就走得，點知又話李少光上去講自由行，跟住自由黨又面聖，然後重有公務員團體，好戲在後頭，班富豪唔執輸，十．一國慶前殺到，咁點走呢？
人哋話《無間道》個卧底要做三年又三年，佢哋就三日及又三日，真係永無寧日，既然回港無期，就不如好好體驗吓京城生活，九月嘅北京最可人，比起數以萬計自由行人士壓境嘅香港特區肯定正得多。
（圖）喺北京採訪嘅記者等極都冇歸期。
傳真︰2623-9278
電郵︰