人民幣應否升值，係一場好嚴峻嘅鬥爭，提升至政治層面，中美日歐嘅政治領袖互拗手瓜；金管局噚晚喺金鐘港麗酒店舉行每年一度嘅名人演講，請來新任中國人民銀行行長周小川，講題係外滙政策，應景到極。
八方噚日六點去到晚宴場地，只見冠蓋雲集，官政界有馬時亨、苗學禮、鄭維健、鄧廣堯、曾德成；銀行界有陳有慶、王守業、伍步高、錢乃驥、陳許多琳、彭玉榮、黃鋼城、黃漢興、朱赤、林炎南、朱燕來、鮑文德、方兆德、孔祥勉；學術界有饒餘慶、曾澍基等。
金管局共開三十五席，其中四席為主家席，嘉賓應有四百名左右。賓客每位要畀八百元，八方相信金管局可能唔使蝕，或者有錢賺㖭。
周行長認真忙，要晚上六時半左右先落機，然後直奔港麗，七時半抵達，稍稍寒暄後開始食飯，八時十分開始講，然後接受嘉賓提問，結果到九時五十先完場，比原定時間長咗四十分鐘，都算值回票價。
回想起中銀當年嘅劉金寶、光大朱小華等領導人，甚至連埋周正毅，如果冇事，噚日亦應該係座上客，重會坐頭枱㖭，世事嘅嘢，有時好令人欷歔。
（圖）周小川吸引力認真唔嘢小，四百位嘉賓喺港麗酒店聽佢演講。
傳真︰2623-9278
電郵︰